منشیات کے مقدمے میں اڈیالہ جیل میں قید معاذ ملک کی اہلیہ نےجیل انتظامیہ پر شوہر سے مبینہ بدفعلی کا الزام لگایا ہے، اس ضمن میں قیدی کی اہلیہ نے درخواست دی ہے اور کاروائی کا مطالبہ کیا ہے
اسلام آباد میں زیرِ سماعت منشیات کے ایک مقدمے میں گرفتار قیدی کے ساتھ اڈیالہ جیل میں مبینہ بدفعلی کا سنگین الزام سامنے آیا ہے، جہاں قیدی کی اہلیہ نے علاقہ مجسٹریٹ کو درخواست دے کر واقعے کی تحقیقات، میڈیکل معائنہ اور نامزد اہلکار کے خلاف قانونی کارروائی کا مطالبہ کیا ہے۔درخواست کے مطابق سائلہ کے شوہر معاذ ملک تھانہ اے این ایف اسلام آباد کے مقدمہ نمبر 39/26 میں اڈیالہ جیل میں قید ہیں، جبکہ تاحال مقدمے کا چالان عدالت میں پیش نہیں کیا گیا۔درخواست میں مؤقف اختیار کیا گیا ہے کہ 10 اور 11 جون 2026 کو اڈیالہ جیل کے احاطہ انچارج منیر بلوچ نے مبینہ طور پر قیدی کو بیرک سے نکال کر ایک کمرے میں لے جا کر اس کے ساتھ زبردستی بدفعلی کی۔ درخواست گزار کے مطابق واقعے کے بعد قیدی کو دھمکیاں بھی دی گئیں کہ اگر اس نے کسی کو اس بارے میں بتایا تو اسے سنگین نتائج بھگتنا ہوں گے۔درخواست میں مزید کہا گیا ہے کہ 13 جون 2026 کو قیدی نے جیل سے فون پر اپنی اہلیہ کو مبینہ واقعے سے آگاہ کیا، تاہم اگلے روز اتوار کی تعطیل ہونے کے باعث وہ فوری طور پر عدالت سے رجوع نہ کر سکی۔
سائلہ نے اپنی درخواست میں یہ بھی دعویٰ کیا ہے کہ نامزد اہلکار اب بھی اس کے شوہر کو مسلسل دھمکیاں دے رہا ہے اور دوبارہ مبینہ بدفعلی کرنے پر اصرار کر رہا ہے، جس کے باعث قیدی شدید خوف و ہراس کا شکار ہے۔درخواست گزار نے عدالت سے استدعا کی ہے کہ اس کے شوہر کو اڈیالہ جیل سے طلب کر کے فوری میڈیکل معائنہ کرایا جائے، الزامات کی غیر جانبدارانہ تحقیقات کی جائیں اور اگر الزامات درست ثابت ہوں تو نامزد اہلکار منیر بلوچ کے خلاف سخت قانونی کارروائی عمل میں لائی جائے۔