‎جے یو آئی کا احتجاج مؤخر، حکومت کی یقین دہانی پر بڑا فیصلہ

اسلام آباد میں اہم پیش رفت سامنے آئی ہے جہاں وزیراعظم شہباز شریف کا پیغام لے کر ایک اعلیٰ سطحی حکومتی وفد جمعیت علماء اسلام کے سربراہ مولانا فضل الرحمان کی رہائش گاہ پہنچا۔ وفد میں وزیر داخلہ محسن نقوی، رانا ثناء اللہ اور طارق فضل چوہدری شامل تھے۔
‎ذرائع کے مطابق وزیراعظم نے جے یو آئی سے درخواست کی کہ ایران، امریکا اور دیگر ممالک کے وفود کی اسلام آباد آمد کے پیش نظر جمعہ کو اعلان کردہ مظاہرے مؤخر کیے جائیں تاکہ عالمی سطح پر مثبت پیغام دیا جا سکے اور جاری امن مذاکرات کو حتمی شکل دینے میں آسانی ہو۔
‎ملاقات کے دوران مولانا فضل الرحمان نے حکومتی وفد کو عوام میں بڑھتی بے چینی سے آگاہ کیا، خاص طور پر پیٹرول کی قیمتوں میں اضافے کو شدید تنقید کا نشانہ بنایا۔ انہوں نے مطالبہ کیا کہ حکومت فوری طور پر پیٹرول کی قیمتوں میں کمی کرے تاکہ عوام کو ریلیف دیا جا سکے۔
‎اس موقع پر حکومتی وفد نے یقین دہانی کرائی کہ آئندہ چند روز میں پیٹرول کی قیمتوں میں کمی کا اعلان کیا جائے گا۔ اس یقین دہانی کے بعد مولانا فضل الرحمان نے جماعتی قیادت سے مشاورت کی اور جذبہ خیرسگالی کے تحت ملک بھر میں جمعہ کو ہونے والے احتجاجی مظاہروں کو مؤخر کرنے کا اعلان کیا۔
‎جے یو آئی کی جانب سے عوام کو اپیل کی گئی ہے کہ وہ 12 اپریل 2026 کو مردان میں ہونے والے جلسہ عام میں شرکت کریں، جہاں آئندہ کے لائحہ عمل کا اعلان کیا جائے گا۔
‎بیان کے اختتام پر ملک اور عالم اسلام کے لیے امن و سلامتی کی دعا بھی کی گئی۔