بھارت کی ریاست کرناٹک میں امریکی خاتون کو زیادتی کا نشانہ بنا دیا گیا۔ پولیس نے شکایت موصول ہونے کے بعد ہوم اسٹے کے مالک اور ایک ملازم کو گرفتار کر لیا ہے۔
خاتون کی شکایت کے مطابق، ملزم وروجیش کمار، جو جھارکھنڈ کا رہائشی ہے اور ہوم اسٹے میں کام کرتا تھا، نے مبینہ طور پر ان کے ساتھ زیادتی کی۔ یہ واقعہ کوڈاگو ضلع کے کُٹّا گاؤں میں پیش آیا۔پولیس کے مطابق، ہوم اسٹے کے مالک پر بھی مقدمہ درج کیا گیا ہے کیونکہ اس نے مبینہ طور پر واقعے کو چھپانے کی کوشش کی۔ الزام ہے کہ اس نے تین دن تک وائی فائی سروس بند رکھی، جس کے باعث متاثرہ خاتون کسی سے رابطہ نہ کر سکیں۔بعد ازاں، وائی فائی بحال ہونے پر خاتون نے میسورو جانے کا بہانہ بنا کر وہاں سے روانگی اختیار کی اور امریکی سفارت خانے کو اس واقعے کی اطلاع دی۔ امریکی حکام نے ای میل کے ذریعے میسورو پولیس سے رابطہ کیا، جس کے بعد باضابطہ طور پر مقدمہ درج کیا گیا۔
کوڈاگو کے سپرنٹنڈنٹ آف پولیس کے مطابق، کُٹّا پولیس اسٹیشن میں غیر ملکی خاتون کے ساتھ جنسی زیادتی کا کیس درج کر لیا گیا ہے۔ دونوں ملزمان کو گرفتار کر کے 3 مئی تک عدالتی تحویل میں بھیج دیا گیا ہے، جبکہ مزید تحقیقات جاری ہیں۔