بالی ووڈ کی معروف اداکارہ کترینہ کیف کی اسکرین پر واپسی سے متعلق گردش کرنے والی خبروں پر ان کی آفیشل ٹیم نے اہم وضاحت جاری کر دی ہے۔
بھارتی میڈیا رپورٹس کے مطابق حالیہ دنوں یہ قیاس آرائیاں سامنے آئی تھیں کہ کترینہ کیف 2027ء میں اداکاری کی دنیا میں دوبارہ سرگرم ہونے کا ارادہ رکھتی ہیں اور وہ کسی او ٹی ٹی پلیٹ فارم کے ذریعے اپنا ڈیبیو بھی کر سکتی ہیں۔تاہم اداکارہ کی آفیشل ٹیم نے ان تمام خبروں کی سختی سے تردید کرتے ہوئے واضح کیا ہے کہ کترینہ کیف کی واپسی سے متعلق جاری ہونے والی رپورٹس بے بنیاد اور محض قیاس آرائیوں پر مبنی ہیں۔ ٹیم کے مطابق اس حوالے سے کوئی باضابطہ منصوبہ یا اعلان موجود نہیں۔
بھارتی میڈیا کے مطابق کترینہ کیف کو آخری بار جنوری 2024ء میں ریلیز ہونے والی فلم میری کرسمس میں دیکھا گیا تھا، جس میں ان کی اداکاری کو شائقین کی جانب سے سراہا گیا تھا۔یاد رہے کہ گزشتہ سال نومبر میں کترینہ کیف اور ان کے شوہر وکی کوشل کے ہاں پہلے بچے کی پیدائش ہوئی تھی، جس کے بعد اداکارہ نے اپنی ذاتی زندگی اور خاندان کو وقت دینے کے لیے شوبز سرگرمیوں سے وقفہ اختیار کر لیا تھا۔واضح رہے کہ کترینہ کیف اور وکی کوشل نے 9 دسمبر 2021ء کو بھارتی ریاست راجھستان کے ایک شاہی ریزورٹ میں نجی مگر پُروقار تقریب کے دوران شادی کی تھی۔