قصور
خطرناک ڈکیت گینگ کے پانچ ارکان گرفتار، لاکھوں روپے مالیت کا مال مسروقہ برآمد
قصور کے ڈسٹرکٹ پولیس آفیسر قصور آفتاب احمد پھلروان کی ہدایت پر تھانہ تھہ شیخم پولیس نے کامیاب کارروائی کرتے ہوئے راہزنی کی متعدد وارداتوں میں ملوث ظفر عرف ظفری ڈکیت گینگ کے پانچ ارکان کو گرفتار کر لیا۔
پولیس کے مطابق گرفتار ملزمان کے قبضے سے لوٹی گئی 3 لاکھ روپے نقد رقم، 7 موبائل فونز، دیگر قیمتی سامان، ایک رائفل اور 5 پسٹل برآمد کر لیے گئے ہیں۔
ابتدائی تفتیش میں انکشاف ہوا ہے کہ ملزمان موٹر سائیکلوں پر دو سے تین افراد کے گروپوں کی صورت میں مختلف علاقوں میں گھومتے اور راہگیروں کو اسلحہ کے زور پر لوٹتے تھے۔
پولیس کا کہنا ہے کہ ملزمان نے دورانِ تفتیش تھانہ تھہ شیخم اور راجہ جنگ کے علاقوں میں راہزنی اور چوری کی 20 سے زائد وارداتوں کا اعتراف کیا ہے، جبکہ مزید تفتیش جاری ہے اور مزید انکشافات متوقع ہیں۔
ڈی پی او قصور آفتاب احمد پھلروان نے کامیاب کارروائی پر تھانہ تھہ شیخم پولیس ٹیم کو شاباش دیتے ہوئے ان کی کارکردگی کو سراہا