اٹلی کے شہر میلان سے دبئی کے راستے تھائی لینڈ جانے والی فلائی دبئی کی ایک پرواز میں خاتون مسافر کو مبینہ طور پر جنسی طور پر ہراساں کرنے کے الزام میں ایک پاکستانی شہری کو بینکاک پہنچنے پر حراست میں لے لیا گیا۔
بین الاقوامی میڈیا رپورٹس کے مطابق 33 سالہ تھائی خاتون نے الزام عائد کیا کہ وہ پرواز کے دوران اپنی چار سالہ بیٹی کو گود میں لیے سو رہی تھیں، اسی دوران ان کے ساتھ والی نشست پر موجود 30 سالہ پاکستانی مسافر نے مبینہ طور پر ان کے ساتھ نازیبا حرکات کیں۔خاتون کا کہنا ہے کہ وہ اچانک بیدار ہو گئیں، جس پر ملزم نے اپنی حرکت چھپانے کی کوشش کرتے ہوئے ایسا ظاہر کیا جیسے وہ نشست کے سامنے لگی اسکرین کو درست کر رہا ہو، تاہم وہ مسلسل ان کی جانب دیکھتا رہا۔شکایت ملنے پر خاتون نے فوری طور پر فضائی عملے کو آگاہ کیا، جس کے بعد عملے نے واقعے کا نوٹس لیتے ہوئے بینکاک کے ڈان میوانگ انٹرنیشنل ایئرپورٹ کے حکام کو اطلاع دی۔ طیارہ لینڈ ہوتے ہی پولیس نے پاکستانی مسافر، جس کی شناخت رضا علی کے نام سے بتائی گئی ہے، کو اپنی تحویل میں لے لیا۔
رپورٹ کے مطابق خاتون نے دعویٰ کیا کہ ابتدا میں ملزم نے الزامات کی تردید کی، تاہم بعد ازاں مبینہ طور پر معافی مانگنے لگا۔ خاتون کا کہنا ہے کہ ملزم نے انہیں معاف کرنے کی درخواست کی، جبکہ اس کے ساتھ سفر کرنے والے بعض افراد نے بھی معاملہ ختم کرنے کی اپیل کی۔تھائی پولیس کے مطابق ملزم کو فی الحال ملک میں داخلے کی اجازت نہیں دی گئی اور خاتون کا تفصیلی بیان ریکارڈ کیا جا رہا ہے۔ حکام کا کہنا ہے کہ قانون کے مطابق ابتدائی مرحلے میں فریقین کے درمیان مصالحت کی کوشش کی جا سکتی ہے، تاہم واقعے کی باقاعدہ تحقیقات جاری ہیں۔
متاثرہ خاتون نے واضح کیا ہے کہ وہ ملزم کے خلاف قانونی کارروائی جاری رکھیں گی اور ہرجانے کا بھی مطالبہ کریں گی۔ ان کا کہنا تھا کہ اپنی شناخت ظاہر کرنے کا مقصد دیگر خواتین کو آگاہ کرنا ہے تاکہ وہ ایسے کسی واقعے کی صورت میں خاموش رہنے کے بجائے فوری طور پر فضائی عملے سے مدد حاصل کریں۔