لاہور کے علاقے اسلام پورہ میں خاتون ارشم مقصود کی پھندا لگی لاش ملنے کے معاملے میں پولیس نے نامزد ملزم سمیت دو افراد کو حراست میں لے لیا۔
ٹک ٹاکر، بیوٹیشن ارشم کی ہلاکت میں نیا موڑ،پولیس نے واقعہ کے 5 روز بعد قتل کی دفعات کے تحت مقدمہ درج کرلیا۔ مقدمہ مقتولہ کے والد کے بیان پر درج کیا گیا۔ ابتدائی طور پر پولیس نے معاملے کو خودکشی قرار دیا تھا۔ پولیس نے قتل کے مقدمہ کے بعد دو افراد کو حراست میں لیا ہے۔ حراست میں لیے گئے ملزمان میں مقتولہ کا سابق شوہر اکرم بھی شامل ہے۔ ارشم مقصود چار ستمبر کو اپنے فلیٹ میں مردہ پائی گئی تھی۔ قریبی فلیٹوں پر موجود افراد نے فلیٹ سے تعفن اٹھنے پر پولیس کو اطلاع دی تھی۔ ارشم بیوٹشن تھی اور اس نے ان کپڑوں کی فروخت کا کام بھی شروع کیا تھا۔ابتدائی طور پر واقعہ خود کشی معلوم ہوا، تاہم پولیس نے تمام پہلوؤں سے تحقیقات شروع کر دی تھیں۔تھانہ اسلام پورہ پولیس نے مقتولہ کے والد کی مدعیت میں مقدمہ درج کرکے تفتیش کا آغاز کیا۔ ترجمان ڈی آئی جی آپریشنز کے مطابق پولیس نے نامزد ملزم اکرم سمیت دو افراد کو حراست میں لیا ہے، جبکہ واقعے کی تفتیش کا دائرہ کار وسیع کر دیا گیا ہے۔
پولیس کا کہنا ہے کہ زیرِ حراست افراد کے واقعے میں ممکنہ کردار کا تعین شواہد کی روشنی میں کیا جا رہا ہے۔ مقتولہ کی پوسٹ مارٹم رپورٹ بھی پولیس کو موصول ہو چکی ہے، جسے تفتیش کا حصہ بنا لیا گیا ہے۔ترجمان ڈی آئی جی آپریشنز کے مطابق پوسٹ مارٹم رپورٹ، موقع سے ملنے والے شواہد اور دیگر حقائق کی روشنی میں تحقیقات آگے بڑھائی جا رہی ہیں۔ خاتون کی موت خود کشی تھی یا اس کے پیچھے کوئی اور پہلو کارفرما تھا، پولیس مختلف زاویوں سے جانچ کر رہی ہے۔پولیس حکام کا کہنا ہے کہ تمام پہلوؤں کی مکمل چھان بین اور شواہد کی روشنی میں حتمی نتیجے تک پہنچا جائے گا۔