مردان میں پاک فضائیہ کے تربیتی طیارے کے حادثے میں شہید ہونے والے لیفٹیننٹ محمد قاسم عبداللہ (پاکستان ایئر فورس) اور لیفٹیننٹ طہٰ عباسی (پاکستان نیوی) کی نمازِ جنازہ مکمل فوجی اعزاز کے ساتھ ادا کر دی گئی۔
نمازِ جنازہ میں اعلیٰ عسکری حکام، شہداء کے اہلِ خانہ، رشتہ داروں اور مختلف شعبہ ہائے زندگی سے تعلق رکھنے والے افراد نے شرکت کی۔ اس موقع پر شہداء کو گارڈ آف آنر پیش کیا گیا جبکہ وطن کے دفاع کے لیے ان کی خدمات اور قربانیوں کو بھرپور خراجِ عقیدت پیش کیا گیا۔
قوم اپنے ان بہادر سپوتوں کو سلام پیش کرتی ہے جنہوں نے فرض کی ادائیگی کے دوران اپنی جانوں کا نذرانہ دے کر حب الوطنی، عزم اور پیشہ ورانہ وابستگی کی روشن مثال قائم کی۔ شہداء کی قربانیاں وطنِ عزیز کے دفاع اور سلامتی کے لیے ہمیشہ یاد رکھی جائیں گی۔اللہ تعالیٰ شہداء کو جنت الفردوس میں اعلیٰ ترین مقام عطا فرمائے، ان کی قربانیوں کو اپنی بارگاہ میں قبول فرمائے اور لواحقین کو یہ عظیم صدمہ برداشت کرنے کے لیے صبرِ جمیل، ہمت اور استقامت عطا فرمائے۔ آمین۔