چین میں مسلسل ہونے والی موسلا دھار بارشوں اور بالائی علاقوں سے آنے والے پانی کے باعث 6 صوبائی سطح کے علاقوں میں واقع 9 دریا خطرے کی وارننگ کی سطح سے بلند ہو گئے ہیں، جس کے بعد مختلف علاقوں میں سیلابی صورتحال پیدا ہونے کا خدشہ بڑھ گیا ہے۔
چینی وزارتِ آبی وسائل کے مطابق ہفتے کی صبح سے اتوار کی صبح تک یونان، سیچوان، گوئیژو، چونگ چنگ، ہونان، ہوبے، جیانگ شی، آنہوئی اور گوانگ شی سمیت متعدد علاقوں میں شدید اور کہیں کہیں طوفانی بارشیں ریکارڈ کی گئیں۔ بعض مقامات پر غیر معمولی موسلادھار بارش کے باعث نشیبی علاقے زیرِ آب آنے لگے۔
وزارت کے مطابق بارشوں اور بالائی علاقوں سے آنے والے پانی کے نتیجے میں پانچ صوبائی علاقوں کے سات دریاؤں میں پانی کی سطح خطرے کی مقررہ حد سے تجاوز کر گئی، جبکہ ایک دریا میں پانی کی سطح مقررہ حد سے تقریباً 0.75 میٹر بلند ریکارڈ کی گئی۔ اس کے علاوہ سنکیانگ کے دو دریاؤں میں بھی پانی کا بہاؤ وارننگ لیول سے قدرے زیادہ رہا۔
صورتحال کے پیش نظر چینی حکومت نے لیاؤننگ اور جیلن صوبوں میں سیلاب سے نمٹنے کے لیے لیول تھری فلڈ کنٹرول ایمرجنسی برقرار رکھی ہے، جبکہ گوانگ ڈونگ، گوانگ شی، ہیلونگ جیانگ، سیچوان، شیڈونگ، ہوبے، ہونان، چونگ چنگ اور گوئیژو میں لیول فور ایمرجنسی نافذ ہے۔
چین میں سیلاب سے نمٹنے کے لیے چار درجات پر مشتمل ہنگامی نظام رائج ہے، جس میں لیول ون سب سے زیادہ ہنگامی صورتحال کو ظاہر کرتا ہے۔ حکام نے متعلقہ اداروں کو الرٹ رہنے، دریاؤں کی مسلسل نگرانی کرنے اور ممکنہ متاثرہ علاقوں میں حفاظتی اقدامات مزید سخت کرنے کی ہدایت جاری کر دی ہے۔
ادھر مقامی انتظامیہ نے نشیبی علاقوں کے رہائشیوں کو محتاط رہنے، غیر ضروری سفر سے گریز کرنے اور موسمی و سرکاری ہدایات پر عمل کرنے کی اپیل کی ہے۔ ریسکیو ٹیموں اور امدادی اداروں کو بھی ممکنہ ہنگامی صورتحال سے نمٹنے کے لیے تیار رکھا گیا ہے۔
چین میں شدید بارشوں سے 9 دریا خطرے کی سطح سے بلند، متعدد صوبوں میں فلڈ ایمرجنسی نافذ
