اوکاڑہ (نامہ نگار ملک ظفر) وزیراعلیٰ پنجاب محترمہ مریم نواز شریف کے انقلابی پروگرام "اپنا کھیت، اپنا روزگار” کے تحت ضلع اوکاڑہ میں کامیاب امیدواروں میں سرکاری زرعی اراضی کے الاٹمنٹ سرٹیفکیٹس تقسیم کرنے کی تقریب منعقد ہوئی۔ تقریب میں ڈپٹی کمشنر اوکاڑہ محمد اکرام ملک اور رکن پنجاب اسمبلی میاں محمد منیر نے پہلے مرحلے میں 102 خوش نصیب امیدواروں میں الاٹمنٹ سرٹیفکیٹس تقسیم کیے۔
تفصیلات کے مطابق پہلے مرحلے میں تحصیل اوکاڑہ کے 29، دیپالپور کے 63 اور رینالہ خورد کے 10 کامیاب امیدواروں کو سرٹیفکیٹس دیے گئے۔ اس موقع پر ایڈیشنل ڈپٹی کمشنر (ریونیو) محمد شعجین وسطر، تینوں تحصیلوں کے اسسٹنٹ کمشنرز، دیگر متعلقہ افسران، ضلع بھر سے آنے والے کاشتکار اور اہلِ دیہہ بھی بڑی تعداد میں موجود تھے۔
ڈپٹی کمشنر محمد اکرام ملک نے تقریب سے خطاب کرتے ہوئے کہا کہ وزیراعلیٰ پنجاب مریم نواز شریف شعبہ زراعت کی ترقی اور کسانوں کی خوشحالی کے لیے عملی اقدامات کر رہی ہیں۔ انہوں نے بتایا کہ کامیاب امیدواروں کو شفاف انداز میں پانچ ایکڑ سرکاری زرعی اراضی دس سال کے لیے لیز پر دی جائے گی، جبکہ حکومت پنجاب کی جانب سے کاشتکاری کے آغاز کے لیے فی ایکڑ 50 ہزار روپے گرانٹ بھی فراہم کی جائے گی۔
انہوں نے کہا کہ اس منصوبے سے سرکاری اراضی کا بہتر استعمال ممکن ہوگا، بے روزگار افراد کو روزگار کے مواقع میسر آئیں گے، کاشتکاروں کی زندگی میں نمایاں بہتری آئے گی اور زرعی پیداوار میں اضافہ ہوگا، جس سے غذائی تحفظ کو بھی فروغ ملے گا۔
اس موقع پر رکن پنجاب اسمبلی میاں محمد منیر نے کہا کہ وزیراعلیٰ پنجاب کا یہ منصوبہ کاشتکاروں کی خوشحالی کی جانب ایک اہم سنگِ میل ہے۔ انہوں نے کہا کہ بے روزگار افراد میں الاٹمنٹ سرٹیفکیٹس مکمل شفافیت اور میرٹ کی بنیاد پر تقسیم کیے جا رہے ہیں اور سرکاری اراضی کی الاٹمنٹ کا طریقہ کار انتہائی آسان بنایا گیا ہے تاکہ زیادہ سے زیادہ مستحق افراد اس سے مستفید ہو سکیں۔
تقریب کے اختتام پر کامیاب امیدواروں نے وزیراعلیٰ پنجاب مریم نواز شریف کا شکریہ ادا کرتے ہوئے اس پروگرام کو کسان دوست اقدام قرار دیا اور امید ظاہر کی کہ اس سے نہ صرف ان کی معاشی حالت بہتر ہوگی بلکہ زرعی شعبے کی ترقی میں بھی مثبت کردار ادا ہوگا۔
اوکاڑہ،اپنا کھیت، اپنا روزگار، کامیاب امیدواروں میں الاٹمنٹ سرٹیفکیٹس تقسیم
