کراچی: پاکستان نیول اکیڈمی میں مڈشپ مین اور شارٹ سروس کمیشن کورس کی پاسنگ آؤٹ اور کمیشننگ پریڈ کا شاندار انعقاد کیا گیا۔
آئی ایس پی آر کے مطابق تقریب میں 90 مڈشپ مین اور 34 شارٹ سروس کمیشن کیڈٹس نے کامیابی کے ساتھ تربیت مکمل کر کے پاس آؤٹ ہونے کا اعزاز حاصل کیا،تقریب کے مہمان خصوصی بحرین رائل نیول فورس کے کمانڈر ریئر ایڈمرل تھے، جن کا استقبال چیف آف نیول اسٹاف ایڈمرل نوید اشرف نے کیا، مہمان خصوصی نے پاکستان نیوی کو خطے کی ایک اہم، پیشہ ور اور منظم بحری فورس قرار دیتے ہوئے پاک بحریہ کی تربیتی صلاحیتوں کو سراہا، انہوں نے دوست ممالک کے کیڈٹس کو اعلیٰ معیار کی تربیت فراہم کرنے پر پاکستان نیوی کی خدمات کی تعریف کی۔
آئی ایس پی آر کے مطابق پریڈ میں بحرین، عراق، جبوتی، سری لنکا اور ترکیہ کے کیڈٹس نے بھی شرکت کی، جو پاک نیوی اور دوست ممالک کے درمیان دیرینہ تعلقات اور مشترکہ اقدار کا مظہر ہے اس موقع پر پاکستان اور بحرین کے درمیان قریبی دفاعی تعاون اور باہمی اعتماد کے عزم کا بھی اعادہ کیا گیا۔
تائیوان میں زلزلے کے شدید جھٹکے
آئی ایس پی آر کے مطابق نمایاں کارکردگی کا مظاہرہ کرنے والے کیڈٹس میں انعامات تقسیم کیے گئے، مڈشپ مین محمد عزیر عباس کو بہترین مجموعی کارکردگی پر سوورڈ آف آنر دیا گیا، جبکہ مڈشپ مین شہاب احمد نے اکیڈمی ڈِرک حاصل کی،چیف آف نیول اسٹاف گولڈ میڈ لز پاکستان اور عراق کے کیڈٹس نے اپنے نام کیے، جبکہ شارٹ سروس کمیشن کورس میں سید سعد شاہد نے کمانڈنٹ گولڈ میڈل حاصل کیا، کوارٹرڈیک اسکواڈرن کو مجموعی کارکردگی پر پروفیشنسی بینر سے نوازا گیا۔