امریکی رکن کانگریس ریان زِنکے کا کہنا ہے کہ پاک امریکا دوستی اس وقت تاریخ کی بُلند ترین سطح پر ہے۔
تفصیلات کے مطابق سفارت خانہ پاکستان واشنگٹن ڈی سی میں مینگو فیسٹیول کا انعقاد کیا گیا جس میں امریکیوں ، پاکستانیوں اور مُختلف شعبہ ہائے زندگی سے تعلق رکھنے والے لوگوں نے بھرپورشرکت کی۔
واشنگٹن ڈی سی اور گردو نواح کی ریاستوں میں مقیم امریکی و دیگر سفارتی برادری، امریکی انتظامیہ کے اہلکاروں، پالیسی سازوں، تھنک ٹینک ، ادبی حلقوں، میڈیا نمائندگان ، امریکی شہریوں اور پاکستانی امریکی کمیونٹی کی بڑی تعداد فیسٹیول میں موجود تھی۔
پاکستانی سفیر رضوان سعید شیخ اور ان کی اہلیہ لبنیٰ رضوان کی جانب سے شرکاء کا پرجوش استقبال کیا گیا، مینگو فیسٹیول میں شرکت کرنے والے مہمانوں کی آمو ں اور آموں سے بنی مختلف اشیا سے تواضع کی گئی۔
تقریب سے رکن کانگریس ، ممبر امور خارجہ کمیٹی اور سابق نیوی سیل ریان زنکے نے خطاب کرتے ہوئے کہا کہ پاک امریکا دوستی اس وقت تاریخ کی بُلند تر ین سطح پر ہے اس موقع پر پاکستانی سفیر رضوان سعید شیخ کا اپنے خطاب میں کہنا تھا کہ پاکستانی آم کے ذائقے کا سفر صدیوں پر مُحیط ہے اورکم و بیش ملک کی شناخت کا درجہ حاصل کر چُکا ہے،آج اس فیسٹیول میں بھرپور شرکت پاکستان کی بڑھتی ہوئی قبولیت اور مقبولیت کی عکاس ہے۔
انہوں نے کہا کہ آج کی شام پاکستانی آموں کی مٹھاس پاک امریکا دوستی کو مزید میٹھا ، گہرا اور قابل ستائش بناتی ہے،ہماری دفاعی اور سفارتی صلاحیتوں کے ناقا بِلِ تردید مُظاہر ےکی طرح ہمارے آموں کا ذائقہ بھی ہماری زرعی روایت اور صلاحیت کا مُنہ بولتا ثبوت ہے،ہمیں پاک امریکا دوستی اور شراکت داری کو ہما رے آم جیسا لاثانی ذائقہ دینے کے لئے رُو بہ عمل ہونا ہے۔