ایف آئی ایچ ہاکی ورلڈ کپ 2026 کے درجہ بندی میچ میں پاکستان ہاکی ٹیم نے جنوبی افریقہ کو سنسنی خیز پنالٹی شوٹ آؤٹ میں شکست دے کر ایونٹ میں 11ویں پوزیشن حاصل کرلی۔
ایمسٹل وین کے ویگنر ہاکی اسٹیڈیم میں پاکستان اور جنوبی افریقہ کے درمیان 11ویں اور 12ویں پوزیشن کے لیے کھیلا گیا میچ مقررہ وقت تک برابر رہا، جس کے بعد فاتح ٹیم کا فیصلہ پنالٹی شوٹ آؤٹ پر ہوا۔
پنالٹی شوٹ آؤٹ میں قومی کھلاڑیوں نے دباؤ کے باوجود شاندار اعصاب کا مظاہرہ کیا اور جنوبی افریقہ کو شکست دے کر ورلڈ کپ مہم کا کامیابی سے اختتام کیا۔
پاکستان نے ٹورنامنٹ سے قبل ایف آئی ایچ عالمی رینکنگ میں 12ویں پوزیشن حاصل کر رکھی تھی، تاہم جنوبی افریقہ کے خلاف فتح کے بعد قومی ٹیم ایک درجہ بہتری کے ساتھ عالمی رینکنگ میں 11ویں پوزیشن پر پہنچ گئی۔
اگرچہ ورلڈ کپ میں 11ویں پوزیشن قومی ٹیم کی مطلوبہ پوزیشن نہیں تھی، تاہم جنوبی افریقہ کے خلاف کامیابی نے گرین شرٹس کو عالمی رینکنگ میں اہم فائدہ پہنچایا ہے۔ قومی ٹیم آئندہ بین الاقوامی مقابلوں میں کامیابی کا سلسلہ برقرار رکھتے ہوئے عالمی ہاکی میں اپنی پوزیشن مزید بہتر بنانے کی کوشش کرے گی۔