پاکستان کو نقصان پہنچانےکا افغانستان کا دعویٰ بھارتی پراکیسز کاپروپیگنڈہ

وزیراعظم شہباز شریف کےترجمان مشرف زیدی کا کہنا ہے کہ پاک۔افغان سرحد پر جاری کشیدگی کے حوالے سے تازہ ترین اطلاعات کے مطابق الحمدللہ نہ تو کسی پاکستانی چوکی پر قبضہ کیا گیا ہے اور نہ ہی کسی فوجی تنصیب کو نقصان پہنچا ہے۔ سیکیورٹی ذرائع کا کہنا ہے کہ بلااشتعال جارحیت کے جواب میں پاکستانی فورسز نے موثر اور فوری کارروائی کرتے ہوئے سرحد پار موجود حملہ آور عناصر کو بھاری نقصان پہنچایا ہے۔

ذرائع کے مطابق افغان طالبان کی جانب سے کی گئی اشتعال انگیزی کا منہ توڑ جواب دیا گیا، جس کے نتیجے میں دشمن کو جانی و مالی نقصانات اٹھانا پڑے۔ پاکستانی سیکیورٹی ادارے مکمل الرٹ ہیں اور سرحدی علاقوں میں نگرانی کا نظام مزید سخت کر دیا گیا ہے۔سیکیورٹی حکام نے واضح کیا ہے کہ اب تک کسی بھی پاکستانی فوجی کے شہید یا اغوا ہونے کی کوئی اطلاع نہیں ہے۔ سوشل میڈیا پر گردش کرنے والے ایسے تمام دعوے بے بنیاد اور من گھڑت قرار دیے گئے ہیں جن میں پاکستانی چوکیوں کو نقصان پہنچانے یا اہلکاروں کے اغوا کا ذکر کیا جا رہا ہے۔ ذرائع کا کہنا ہے کہ یہ پروپیگنڈا بھارت کے حمایت یافتہ عناصر کی جانب سے پھیلایا جا رہا ہے تاکہ صورتحال کو غلط رنگ دیا جا سکے۔

اعلیٰ عسکری حلقوں نے اس عزم کا اعادہ کیا ہے کہ پاکستان کی خودمختاری اور سرحدی سالمیت پر کسی بھی قسم کی جارحیت کا جواب فوری اور مؤثر انداز میں دیا جائے گا۔ حکام کے مطابق افواجِ پاکستان ہر قسم کی صورتحال سے نمٹنے کی مکمل صلاحیت رکھتی ہیں اور قومی دفاع پر کوئی سمجھوتہ نہیں کیا جائے گا۔سیکیورٹی تجزیہ کاروں کا کہنا ہے کہ موجودہ حالات میں ذمہ دارانہ رپورٹنگ اور مصدقہ اطلاعات کی اشاعت نہایت ضروری ہے تاکہ افواہوں اور دشمن کے پروپیگنڈے کا سدباب کیا جا سکے۔حکام نے عوام سے اپیل کی ہے کہ غیر مصدقہ خبروں پر کان نہ دھریں اور صرف مستند ذرائع سے جاری کردہ معلومات پر یقین کریں۔