پاکستان کی انڈر 16 والی بال ٹیم نے ایشین انڈر 16 والی بال چیمپئن شپ میں شاندار کارکردگی کا مظاہرہ کرتے ہوئے دفاعی چیمپئن ایران کو سنسنی خیز مقابلے کے بعد شکست دے کر پہلی مرتبہ یہ ٹائٹل جیت لیا ہے۔
فائنل میچ میں پاکستان اور ایران کے درمیان زبردست مقابلہ دیکھنے میں آیا، جہاں پاکستان نے ابتدائی دو سیٹس میں پیچھے رہتے ہوئے اپنی حوصلہ مندی اور جذبے کی بدولت تین سیٹس جیت کر تاریخی فتح حاصل کی۔ میچ کا اسکور 22-25، 21-25، 30-28، 25-21 اور 15-10 رہا۔
پاکستان کی جانب سے محمد جنید اور فیضان اللہ نے شاندار کھیل پیش کیا اور اپنی ٹیم کو مشکل حالات میں سنبھالا۔ ان دونوں کھلاڑیوں کی بہترین کارکردگی نے ٹیم کو کم بیک کرنے میں اہم کردار ادا کیا۔
پاکستانی ٹیم کی یہ فتح نہ صرف ملک کے لیے باعث فخر ہے بلکہ نوجوان کھلاڑیوں کے لیے بھی ایک حوصلہ افزا مثال ہے کہ محنت اور لگن سے بڑی کامیابیاں حاصل کی جا سکتی ہیں۔تاریخی طور پر یہ پہلی بار ہے کہ پاکستان نے ایشین انڈر 16 والی بال چیمپئن شپ کا ٹائٹل جیتا ہے، جو ملکی کھیلوں کی تاریخ میں ایک سنہری باب کے طور پر یاد رکھا جائے گا۔