سیالکوٹ: وزیر دفاع خواجہ آصف نے کہا ہے کہ ایران سے متعلق حالیہ جنگ اور کشیدگی کے دوران پاکستان نے جو سفارتی کردار ادا کیا، وہ تاریخ میں ہمیشہ یاد رکھا جائے گا۔
میڈیا سے گفتگو کرتے ہوئے خواجہ آصف نے کہا کہ یومِ عاشور ایسے وقت میں آیا جب خطہ ایک بڑی جنگ کی لپیٹ میں تھا۔ ان کا کہنا تھا کہ ایرانی عوام نے اپنے طرزِ عمل سے حضرت امام حسینؓ اور شہدائے کربلا کی قربانیوں کی یاد تازہ کر دی۔
وزیر دفاع نے کہا کہ پاکستان نے کشیدگی کم کرنے اور دونوں ممالک کے درمیان صلح کی راہ ہموار کرنے کے لیے مؤثر سفارتی کوششیں کیں، جس کے باعث ملک پوری امت مسلمہ کے سامنے سرخرو ہوا۔
انہوں نے مزید کہا کہ پاکستان کا کردار تاریخ میں ہمیشہ یاد رکھا جائے گا اور آنے والی نسلیں بھی اس سفارتی کامیابی کو قدر کی نگاہ سے دیکھیں گی۔
خواجہ آصف نے خطے میں امن و استحکام کی ضرورت پر زور دیتے ہوئے کہا کہ دعا ہے لبنان اسرائیلی جارحیت سے نجات حاصل کرے اور دنیا بھر میں جہاں کہیں بھی مسلمان ظلم و ستم کا شکار ہیں، اللہ تعالیٰ انہیں آزادی، امن اور استحکام عطا فرمائے۔
ایران جنگ میں پاکستان کا کردار تاریخ میں سنہری الفاظ سے لکھا جائے گا، خواجہ آصف
