صوبائی ڈیزاسٹر مینجمنٹ اتھارٹی (پی ڈی ایم اے) پنجاب نے گزشتہ چار روز کے دوران ہونے والی مون سون بارشوں کی تفصیلی رپورٹ جاری کر دی ہے، جس کے مطابق لاہور سب سے زیادہ بارش ریکارڈ کرنے والا شہر رہا جہاں مجموعی طور پر 383 ملی میٹر بارش ہوئی۔
پی ڈی ایم اے کی رپورٹ کے مطابق گوجرانوالہ میں 328 ملی میٹر، سیالکوٹ میں 321 ملی میٹر، نارووال میں 270 ملی میٹر، مری میں 211 ملی میٹر، منڈی بہاؤالدین میں 177 ملی میٹر، گجرات میں 144 ملی میٹر اور جہلم میں 115 ملی میٹر بارش ریکارڈ کی گئی۔
رپورٹ میں بتایا گیا کہ حافظ آباد میں 108 ملی میٹر، منگلا میں 102 ملی میٹر، چکوال میں 96 ملی میٹر، شیخوپورہ میں 85 ملی میٹر، اوکاڑہ میں 72 ملی میٹر، جھنگ میں 66 ملی میٹر، ٹوبہ ٹیک سنگھ میں 57 ملی میٹر، اٹک میں 56 ملی میٹر، قصور میں 52 ملی میٹر، راولپنڈی میں 47 ملی میٹر، لیہ میں 35 ملی میٹر اور ساہیوال میں 34 ملی میٹر بارش ریکارڈ کی گئی۔ اس کے علاوہ فیصل آباد، سرگودھا، ڈیرہ غازی خان، خانیوال، بہاولنگر اور بھکر میں بھی مختلف مقامات پر بارش ہوئی۔
پی ڈی ایم اے کے مطابق وزیراعلیٰ پنجاب مریم نواز شریف کی ہدایت پر دریاؤں، ڈیموں اور بیراجوں کی مسلسل نگرانی جاری ہے تاکہ کسی بھی ممکنہ سیلابی صورتحال سے بروقت نمٹا جا سکے۔ متعلقہ اداروں کو ہائی الرٹ رہنے اور ہنگامی اقدامات یقینی بنانے کی ہدایت بھی جاری کی گئی ہے۔
حکام کا کہنا ہے کہ حالیہ مون سون بارشوں کے دوران شدید متاثرہ علاقوں میں ریکارڈ وقت میں نکاسی آب کا عمل مکمل کیا گیا۔ پنجاب کے 41 اضلاع میں واسا کے نظام، ایک ہزار سے زائد مشینری اور فیلڈ عملے کی موجودگی کے باعث ہفتوں میں مکمل ہونے والا کام چند گھنٹوں میں انجام دیا گیا، جس سے شہریوں کو کافی حد تک ریلیف ملا۔
پی ڈی ایم اے کے مطابق مون سون سیزن کے دوران تمام متعلقہ اضلاع کی صورتحال پر سیف سٹی کیمروں اور کنٹرول رومز کے ذریعے مسلسل نظر رکھی جا رہی ہے، جبکہ ضلعی انتظامیہ اور ریسکیو اداروں کو ہر ممکن ہنگامی صورتحال سے نمٹنے کے لیے الرٹ رکھا گیا ہے۔
پنجاب میں 4 روزہ مون سون بارشوں کی رپورٹ جاری، لاہور میں 383 ملی میٹر ریکارڈ
