پیریز ہلٹن تشویشناک واقعے کے بعد اسپتال منتقل، طبی نگرانی جاری

‎امریکی شوبز انڈسٹری کے معروف سیلیبریٹی بلاگر، پوڈکاسٹر اور میڈیا شخصیت پیریز ہلٹن کو ایک تشویشناک واقعے کے بعد ریاست فلوریڈا کے شہر میامی میں اسپتال منتقل کر دیا گیا، جہاں انہیں طبی امداد فراہم کی جا رہی ہے۔
‎غیر ملکی میڈیا رپورٹس کے مطابق میامی ڈیڈ کاؤنٹی شیرف آفس کو سوشل میڈیا پر جاری ایک لائیو نشریات کے حوالے سے متعدد کالز موصول ہوئیں۔ کال کرنے والوں نے ایک شخص کی ذہنی کیفیت اور حفاظت پر تشویش کا اظہار کیا، جس کے بعد پولیس اور امدادی ٹیمیں فوری طور پر متعلقہ رہائش گاہ پہنچ گئیں۔
‎حکام کے مطابق جائے وقوعہ پر پہنچنے کے بعد متعلقہ شخص کو محفوظ حالت میں ریسکیو کیا گیا اور میامی ڈیڈ فائر ریسکیو کی ٹیم نے اسے فوری طور پر قریبی اسپتال منتقل کر دیا، جہاں اس کا علاج جاری ہے۔ امریکی حکام نے تصدیق کی ہے کہ متاثرہ شخص کو ضروری طبی سہولیات فراہم کی جا رہی ہیں، تاہم ان کی موجودہ صحت سے متعلق مزید تفصیلات جاری نہیں کی گئیں۔
‎شیرف آفس کی جانب سے جاری ابتدائی بیان میں کسی فرد کا نام ظاہر نہیں کیا گیا تھا، تاہم بعد ازاں حکام نے تصدیق کی کہ اسپتال منتقل کیے جانے والے شخص کا تعلق معروف میڈیا شخصیت پیریز ہلٹن سے ہے۔ پولیس کا کہنا ہے کہ اہل خانہ سے بھی رابطہ کر لیا گیا ہے اور انہیں ہر ممکن تعاون فراہم کیا جا رہا ہے۔
‎واقعے کے بعد پیریز ہلٹن کی نمائندہ ٹیلنٹ مینجمنٹ کمپنی گولڈن آرٹسٹس انٹرٹینمنٹ نے بھی ایک بیان جاری کیا۔ کمپنی کے شریک سربراہان ڈینٹے روسچیولی اور ربیکا کوخان نے کہا کہ وہ سوشل میڈیا پر گردش کرنے والی خبروں سے آگاہ ہیں، لیکن فی الحال ان کا پیریز ہلٹن سے براہ راست رابطہ نہیں ہو سکا۔
‎بیان میں کہا گیا کہ اس وقت کمپنی کی اولین ترجیح پیریز ہلٹن اور ان کے اہل خانہ کی خیریت معلوم کرنا ہے۔ انتظامیہ نے عوام اور میڈیا سے اپیل کی کہ غیر مصدقہ اطلاعات پر یقین نہ کیا جائے اور متاثرہ خاندان کی نجی زندگی کا احترام کیا جائے۔
‎پیریز ہلٹن گزشتہ کئی برسوں سے امریکی شوبز انڈسٹری کی نمایاں شخصیات میں شمار ہوتے ہیں اور ان کے سوشل میڈیا پلیٹ فارمز پر لاکھوں مداح موجود ہیں۔ ان کی صحت سے متعلق مزید معلومات سامنے آنے کا انتظار کیا جا رہا ہے۔