وزیراعظم شہباز شریف نے امن کے عالمی دن کے موقع پر اپنے پیغام میں کہا ہے کہ پاکستان تنازعات کے پُرامن حل کے لیے اپنے غیرمتزلزل عزم کا اعادہ کرتا ہے اور عالمی سطح پر امن کے فروغ کے لیے مسلسل کوششیں جاری رکھے گا۔ انہوں نے کہا کہ موجودہ دور میں دنیا کو پیچیدہ سیکیورٹی چیلنجز کا سامنا ہے جن کا حل صرف بات چیت اور سفارتکاری میں مضمر ہے۔
وزیراعظم نے اپنے بیان میں کہا کہ پاکستان ہمیشہ سے امن، مذاکرات اور باہمی احترام کے اصولوں پر کاربند رہا ہے۔ انہوں نے واضح کیا کہ خطے میں پاکستان کی جاری ثالثی کوششیں اسی سوچ کی عکاس ہیں، جہاں اختلافات کو بات چیت کے ذریعے حل کرنے پر زور دیا جا رہا ہے۔
شہباز شریف کا کہنا تھا کہ پاکستان اقوام متحدہ کے چارٹر کے اصولوں کے تحت اپنی مستقل وابستگی کا اظہار کرتا ہے اور عالمی قوانین کی پاسداری کو اہمیت دیتا ہے۔ انہوں نے کہا کہ پاکستان نہ صرف علاقائی بلکہ عالمی سطح پر بھی امن و استحکام کے فروغ کے لیے تعمیری کردار ادا کرتا رہے گا۔
انہوں نے اس بات پر زور دیا کہ موجودہ حالات میں عالمی برادری کو مل کر ایسے اقدامات کرنے ہوں گے جو کشیدگی کو کم کریں اور پائیدار امن کی بنیاد رکھیں۔ وزیراعظم کے مطابق مذاکرات، اعتماد سازی اور تعاون ہی وہ راستے ہیں جن کے ذریعے دنیا کو درپیش چیلنجز پر قابو پایا جا سکتا ہے۔
تنازعات کے پُرامن حل کا اعادہ: یومِ امن پر وزیراعظم کا پیغام
