اسلام آباد میں وزیراعظم شہباز شریف اور فیلڈ مارشل سید عاصم منیر کے درمیان اہم ملاقات ہوئی جس میں خطے میں پائیدار امن کے لیے پاکستان کے ثالثی کردار کو جاری رکھنے کے عزم کا اعادہ کیا گیا۔
وزیراعظم آفس کی جانب سے جاری اعلامیے کے مطابق ملاقات میں پاکستان کی سفارتی کوششوں اور فریقین کے درمیان کشیدگی کم کرنے کے لیے ہونے والی حالیہ پیشرفت کا تفصیلی جائزہ لیا گیا۔
اعلامیے میں کہا گیا کہ وزیراعظم اور فیلڈ مارشل نے خطے میں کشیدگی میں کمی پر اطمینان کا اظہار کیا اور تمام فریقین پر زور دیا کہ وہ جنگ بندی کو برقرار رکھتے ہوئے صبر و تحمل کا مظاہرہ جاری رکھیں۔
ملاقات کے دوران اس بات پر بھی اتفاق کیا گیا کہ پاکستان خطے میں امن کے قیام کے لیے اپنا مثبت اور فعال کردار ادا کرتا رہے گا اور فریقین کو مذاکرات کی میز پر لانے کی کوششیں جاری رکھے گا۔
وزیراعظم نے اس عمل میں شامل تمام ممالک کے تعاون اور سنجیدگی کو سراہتے ہوئے کہا کہ امن کے لیے مشترکہ کوششیں ہی دیرپا استحکام کی ضمانت بن سکتی ہیں۔
اعلامیے کے مطابق ملاقات میں امن کے عمل کی کامیابی کے لیے نیک تمناؤں کا اظہار کیا گیا جبکہ وزیراعظم نے آئندہ آنے والے عالمی وفود کو پاکستان کے دورے کی باضابطہ دعوت کا اعادہ بھی کیا۔
دوسری جانب عالمی سطح پر بھی پاکستان کی سفارتی کوششوں کو سراہا جا رہا ہے اور مختلف عالمی رہنماؤں کی جانب سے اس کردار کو مثبت قرار دیا گیا ہے۔
وزیراعظم اور فیلڈ مارشل کی ملاقات، امن کیلئے ثالثی جاری رکھنے کا عزم
