اسلام آباد: وزیراعظم محمد شہباز شریف کی زیر صدارت ایڈز، ہیپاٹائٹس سی اور دیگر متعدی امراض کی روک تھام کے حوالے سے ایک اہم اجلاس منعقد ہوا، جس میں ان بیماریوں کے پھیلاؤ کی روک تھام کے لیے جاری اقدامات کا تفصیلی جائزہ لیا گیا۔
اجلاس سے خطاب کرتے ہوئے وزیراعظم نے ہدایت کی کہ متعدی امراض کے فوری سدباب کے لیے غیر معیاری سرنجز کی تیاری، فروخت اور استعمال پر مؤثر پابندی عائد کی جائے۔ انہوں نے کہا کہ خلاف ضابطہ سرنجز کے استعمال یا مجرمانہ غفلت کے مرتکب افراد اور ہسپتالوں کے خلاف بلاامتیاز قانونی کارروائی عمل میں لائی جائے۔وزیراعظم نے متعدی امراض پر قابو پانے کے لیے ماہرین پر مشتمل خصوصی کمیٹی تشکیل دینے کی ہدایت دیتے ہوئے کہا کہ کمیٹی اپنی سفارشات مرتب کرتے وقت تمام صوبوں سے مشاورت کو یقینی بنائے تاکہ قومی سطح پر قابلِ عمل اور مؤثر حکمت عملی تیار کی جا سکے۔انہوں نے وزارتِ قانون کو ہدایت کی کہ متعلقہ اداروں کے ساتھ مل کر موجودہ قانونی اور ریگولیٹری فریم ورک کا جائزہ لے اور ضروری ترامیم کی سفارشات پیش کرے، تاکہ صحت کے شعبے میں مؤثر نگرانی اور قوانین پر سختی سے عملدرآمد ممکن بنایا جا سکے۔
وزیراعظم شہباز شریف نے کہا کہ قومی سطح پر جامع حکمت عملی کی تشکیل اور اس پر مؤثر عملدرآمد ہی متعدی امراض کے مسئلے کا دیرپا حل ہے۔ انہوں نے ہدایت کی کہ ڈرگ ریگولیٹری اتھارٹی آف پاکستان (ڈریپ) سرنجز کے ذریعے بیماریوں کے پھیلاؤ کے مستقل سدباب کے لیے جامع پالیسی اقدامات تجویز کرے۔وزیراعظم نے زور دیا کہ یہ پالیسی اقدامات میڈیکل آلات تیار کرنے والی صنعت سے مشاورت کے بعد مرتب کیے جائیں تاکہ ان پر مؤثر انداز میں عملدرآمد ممکن ہو۔ انہوں نے کہا کہ متعدی امراض کے خاتمے کی قومی کوششوں میں عالمی شراکت داروں کی معاونت بھی انتہائی اہمیت کی حامل ہے۔انہوں نے مزید ہدایت کی کہ طبی آلات کی معیاری تیاری اور طبی عملے کی عالمی معیار کے مطابق تربیت پر خصوصی توجہ دی جائے تاکہ صحت کے نظام کو مزید مضبوط اور محفوظ بنایا جا سکے۔اجلاس میں حکام نے وزیراعظم کو متعدی امراض کے پھیلاؤ کی روک تھام کے لیے اب تک کیے گئے اقدامات اور آئندہ کی حکمت عملی پر تفصیلی بریفنگ بھی دی۔