اسلام آباد: پاکستان اور کینیڈا کے درمیان دوطرفہ تعلقات کو مزید مضبوط بنانے کے لیے نائب وزیراعظم و وزیر خارجہ محمد اسحاق ڈار اور کینیڈین وزیر خارجہ انیتا آنند کے درمیان وفود کی سطح پر اہم ملاقات ہوئی، جس میں باہمی تعاون، تجارت، سرمایہ کاری، زراعت، صنعت اور دیگر شعبوں میں تعلقات کے فروغ پر تبادلہ خیال کیا گیا۔
ملاقات کے آغاز میں نائب وزیراعظم و وزیر خارجہ محمد اسحاق ڈار نے کینیڈین وزیر خارجہ انیتا آنند کا اسلام آباد آمد پر خیرمقدم کرتے ہوئے کہا کہ پاکستان اور کینیڈا کے درمیان مسلسل رابطے برقرار رہے ہیں اور دونوں ممالک کے تعلقات مثبت سمت میں آگے بڑھ رہے ہیں۔اسحاق ڈار نے کہا کہ سوئٹزرلینڈ میں بھی ان کی کینیڈین وزیر خارجہ سے ملاقات ہوئی تھی، جو دونوں ممالک کے درمیان بڑھتے ہوئے سفارتی روابط کا مظہر ہے۔ انہوں نے کہا کہ پاکستان فعال سفارت کاری پر یقین رکھتا ہے اور عالمی سطح پر تعمیری شراکت داری کے فروغ کے لیے پرعزم ہے۔نائب وزیراعظم نے کہا کہ پاکستان اور کینیڈا دوطرفہ تعلقات کو مزید مضبوط بنانے کی بھرپور صلاحیت رکھتے ہیں، جبکہ تجارت، معیشت، تعلیم، زراعت، صنعت اور دیگر شعبوں میں تعاون کے وسیع مواقع موجود ہیں۔انہوں نے کہا کہ کینیڈا میں مقیم پاکستانی برادری دونوں ممالک کے تعلقات کا قیمتی اثاثہ ہے اور یہ کمیونٹی باہمی روابط کو مزید مستحکم بنانے میں اہم کردار ادا کر رہی ہے۔اسحاق ڈار نے امید ظاہر کی کہ کینیڈین وزیر خارجہ کا یہ دورہ دونوں ممالک کے تعلقات کو نئی جہت اور رفتار دے گا۔ انہوں نے اس بات پر بھی زور دیا کہ پاکستان اور کینیڈا کے درمیان اعلیٰ سطح پر زیادہ تواتر سے ملاقاتیں ہونی چاہئیں تاکہ مختلف شعبوں میں تعاون کو مزید وسعت دی جا سکے۔
اس موقع پر کینیڈین وزیر خارجہ انیتا آنند نے پرتپاک استقبال اور پاکستانی میزبانی پر شکریہ ادا کرتے ہوئے کہا کہ کینیڈا پاکستان کے ساتھ تعلقات کو مزید فروغ دینے کے لیے پرعزم ہے۔انہوں نے کہا کہ پاکستان اور کینیڈا کو مختلف شعبوں میں مشترکہ طور پر مزید کام کرنے کی ضرورت ہے تاکہ دونوں ممالک کے عوام کو باہمی تعاون کے ثمرات حاصل ہو سکیں۔انیتا آنند نے بتایا کہ کینیڈا میں تقریباً تین لاکھ پاکستانی نژاد شہری آباد ہیں، جو دونوں ممالک کے درمیان مضبوط سماجی اور ثقافتی روابط کی علامت ہیں۔کینیڈین وزیر خارجہ نے کہا کہ پاکستان اور کینیڈا عالمی معیشت میں مثبت کردار ادا کرنے کی بھرپور صلاحیت رکھتے ہیں، جبکہ زراعت، صنعت، تجارت اور دیگر شعبوں میں تعاون کے وسیع امکانات موجود ہیں۔انہوں نے کہا کہ وہ آج ہونے والے مذاکرات میں دوطرفہ تعاون میں پیش رفت، اقتصادی روابط اور مستقبل کی شراکت داری کے امکانات پر تفصیلی تبادلہ خیال کی منتظر ہیں۔