اسلام آباد: بحریہ ٹاؤن انتظامیہ نے فیلڈ مارشل سیدعاصم منیر کو خط ارسال کرتے ہوئے اپنی قیمتی جائیدادوں کی مبینہ طور پر کم قیمت پر نیلامی کے خلاف مداخلت کی اپیل کی ہے۔
بحریہ ٹاؤن کے وائس چیف ایگزیکٹو کموڈور (ر) محمد الیاس کی جانب سے لکھے گئے خط میں مؤقف اختیار کیا گیا ہے کہ بحریہ ٹاؤن کی اربوں روپے مالیت کی زمینیں اور دیگر املاک ان کی اصل مارکیٹ ویلیو سے کہیں کم قیمت پر نیلام کی جا رہی ہیں، جس سے نیلامی کے عمل کی شفافیت پر سنگین سوالات جنم لے رہے ہیں۔خط کے مطابق بحریہ ٹاؤن کے مختلف منصوبوں میں اوورسیز پاکستانیوں، بیواؤں، عام شہریوں اور دیگر سرمایہ کاروں سمیت لاکھوں خاندانوں کی 372 ارب روپے سے زائد کی عمر بھر کی جمع پونجی سرمایہ کاری کی صورت میں موجود ہے، جو موجودہ صورتحال میں شدید خطرے سے دوچار ہے۔بحریہ ٹاؤن انتظامیہ نے فیلڈ مارشل سید عاصم منیر سے مطالبہ کیا ہے کہ معاملے کی آزادانہ، غیرجانبدار اور شفاف تحقیقات کرائی جائیں اور تحقیقات مکمل ہونے تک املاک کی نیلامی کا عمل فوری طور پر روک دیا جائے۔خط میں کہا گیا ہے کہ بحریہ ٹاؤن خود کو قانون سے بالاتر نہیں سمجھتا اور وہ اپنے تمام دیرینہ قانونی تنازعات کو قانون، باہمی بات چیت اور ثالثی کے ذریعے حل کرنے کے لیے مکمل طور پر تیار ہے۔انتظامیہ نے مزید واضح کیا کہ اگر کسی قانونی کارروائی کے نتیجے میں بحریہ ٹاؤن کے خلاف کسی ذمہ داری یا خلاف ورزی کا تعین ہوتا ہے تو ادارہ قانون کے مطابق تمام واجبات اور ذمہ داریوں کی ادائیگی کے لیے بھی تیار ہوگا۔