اسلام آباد :غیر قانونی گردہ پیوندکاری کیس، قائداعظم انٹرنیشنل ہسپتال کے سی ای او ڈاکٹر شوکت بنگش گرفتار،ڈی جی ایف آئی اے ڈاکٹر عثمان انور کی خصوصی ہدایت پر تشکیل دی گئی ٹیموں کی ابتدائی تحقیقات کے بعد کارروائی، چھ ملزمان پہلے ہی گرفتار ہیں-
وفاقی تحقیقاتی ادارے (ایف آئی اے) نے مبینہ غیر قانونی اور کمرشل گردہ پیوندکاری کے منظم نیٹ ورک کے خلاف تحقیقات میں اہم پیش رفت کرتے ہوئے قائداعظم انٹرنیشنل ہسپتال اسلام آباد کے چیف ایگزیکٹو آفیسر اور مالک ڈاکٹر شوکت بنگش کو گرفتار کر لیا ہے۔
ڈائریکٹر جنرل ایف آئی اے ڈاکٹر عثمان انور کی خصوصی ہدایت پر ایف آئی اے کی تشکیل کردہ ٹیموں نے معاملے کی ابتدائی تحقیقات کیں، جس کے بعد اینٹی کرپشن سرکل اسلام آباد کی ٹیم نے کارروائی کرتے ہوئے ایف آئی آر نمبر 16/2026 میں نامزد ڈاکٹر شوکت بنگش کو حراست میں لے لیا۔
ایف آئی اے کے مطابق ڈاکٹر شوکت بنگش پر الزام ہے کہ قائداعظم انٹرنیشنل ہسپتال میں مبینہ غیر قانونی اور کمرشل گردہ پیوندکاری کی سرگرمیوں میں سہولت کاری کی گئی، تحقیقاتی ٹیمیں ہسپتال انتظامیہ، متعلقہ طبی عملے اور دیگر افراد کے ممکنہ کردار کا بھی جائزہ لے رہی ہیں۔
اس مقدمے میں گردہ ٹرانسپلانٹ سرجن ڈاکٹر نادر، ٹرانسپلانٹ کوآرڈینیٹر عدیل شیرازی سمیت چھ ملزمان پہلے ہی گرفتار کیے جا چکے ہیں ایف آئی اے کے مطابق اسلام آباد ہائی کورٹ سے بعد از گرفتاری ضمانت کی درخواستیں مسترد ہونے کے بعد گرفتار ملزمان جوڈیشل کسٹڈی میں ہیں۔
ایف آئی اے حکام کے مطابق ڈاکٹر شوکت بنگش کی گرفتاری کو تحقیقات میں اہم پیش رفت قرار دیا جا رہا ہے اور اس سے مبینہ نیٹ ورک میں ہسپتال انتظامیہ، عملے اور دیگر افراد کے کردار کے تعین میں مدد ملنے کی توقع ہے۔
گرفتار ملزم کو متعلقہ عدالت میں پیش کرکے جسمانی ریمانڈ حاصل کرنے کی درخواست کی جائے گی،مزید تحقیقات میں ہسپتال کے دیگر عملے کے ممکنہ کردار، مبینہ سہولت کاروں اور نیٹ ورک سے منسلک دیگر افراد کی شناخت بھی کی جائے گی