اسلام آباد: سعودی عرب نے پاکستان کو بڑا مالی ریلیف دیتے ہوئے 5 ارب ڈالر کے قرض کی مدت مزید تین سال کے لیے بڑھا دی ہے۔
ذرائع کے مطابق سعودی حکومت نے پاکستان کا 5 ارب ڈالر کا قرض رول اوور کرنے کی منظوری دے دی ہے، جس سے پاکستان کے زرمبادلہ کے ذخائر اور مالی استحکام کو سہارا ملے گا۔ذرائع کا کہنا ہے کہ یہ رقم سعودی عرب نے پاکستان کو متحدہ عرب امارات کو واجب الادا ادائیگیوں کے لیے فراہم کی تھی۔ ابتدائی طور پر یہ قرض صرف تین ماہ کی مدت کے لیے دیا گیا تھا، تاہم اب اس کی مدت میں مزید تین سال کی توسیع کر دی گئی ہے۔
مالیاتی ماہرین کے مطابق سعودی عرب کے اس فیصلے سے پاکستان پر فوری مالی دباؤ میں کمی آئے گی اور بیرونی ادائیگیوں کے انتظام میں بھی مدد ملے گی۔ تاہم، اس حوالے سے دونوں ممالک کی جانب سے باضابطہ اعلامیہ جاری ہونا ابھی باقی ہے۔