عارف والا میں وزیراعلیٰ پنجاب مریم نواز کے دورے کے دوران اس وقت ایک غیر معمولی واقعہ پیش آیا جب ان کے ہیلی کاپٹر کی لینڈنگ کے دوران ایمیننس اسکول کی بیرونی دیوار گر گئی۔ خوش قسمتی سے اس واقعے میں وزیراعلیٰ پنجاب، ہیلی کاپٹر کے عملے یا اطراف میں موجود کسی بھی شخص کو کوئی جانی نقصان نہیں پہنچا۔
تفصیلات کے مطابق وزیراعلیٰ پنجاب مریم نواز عارف والا میں ایمیننس اسکول کی افتتاحی تقریب میں شرکت کے لیے پہنچیں، جہاں ان کے ہیلی کاپٹر کی لینڈنگ کے لیے قریبی ہاؤسنگ کالونی میں خصوصی ہیلی پیڈ تیار کیا گیا تھا۔
ذرائع کے مطابق ہیلی کاپٹر کے زمین پر اترتے وقت پیدا ہونے والے شدید ہوا کے دباؤ کے باعث اسکول کی بیرونی دیوار اچانک منہدم ہوگئی۔ دیوار گرنے کے بعد موقع پر موجود انتظامیہ اور سیکیورٹی اہلکار فوری طور پر متحرک ہوگئے اور علاقے کا جائزہ لیا گیا۔
حکام کا کہنا ہے کہ واقعے کے باوجود وزیراعلیٰ پنجاب کا دورہ معمول کے مطابق جاری رہا اور افتتاحی تقریب بھی مکمل کی گئی۔ ابتدائی معلومات کے مطابق ہیلی کاپٹر کو بھی کسی قسم کا نقصان نہیں پہنچا۔
انتظامیہ نے واقعے کے بعد متاثرہ مقام کا معائنہ شروع کر دیا ہے تاکہ دیوار گرنے کی وجوہات کا تعین کیا جا سکے۔ متعلقہ ادارے اس بات کا بھی جائزہ لے رہے ہیں کہ آیا دیوار پہلے سے کمزور تھی یا ہیلی کاپٹر کے بلیڈز سے پیدا ہونے والے ہوا کے دباؤ نے اسے گرایا۔
واقعے کے بعد مقامی افراد میں تشویش پائی گئی، تاہم ضلعی انتظامیہ نے یقین دہانی کرائی ہے کہ عوام کی حفاظت اولین ترجیح ہے اور اگر کسی قسم کی غفلت یا تعمیراتی خامی سامنے آئی تو ذمہ داروں کے خلاف قانون کے مطابق کارروائی کی جائے گی۔
عارف والا میں وزیراعلیٰ پنجاب کے ہیلی کاپٹر کی لینڈنگ کے دوران اسکول کی دیوار گر گئی
