پی آئی اے کی فضائی میزبان سمیرا آفتاب کی جانب سے ٹورنٹو سے کراچی آنے والی پرواز میں مبینہ طور پر موبائل فون اسمگلنگ کے معاملے میں تحقیقات میں اہم پیش رفت ہوئی ہے۔
چند روز قبل فضائی میزبان سمیرا آفتاب کینیڈا کے شہر ٹورنٹو سے پرواز PK-784 کے ذریعے کراچی پہنچی تھی، جہاں ایئرپورٹ پر تلاشی کے دوران اس کے سامان سے غیر قانونی طور پر لائے جانے والے لاکھوں روپے مالیت کےاسمارٹ فونز اور جدید سمارٹ واچز برآمد ہوئی تھیں، جو مبینہ طور پر پی آئی اے کی جانب سے فراہم کی گئی کیپ کے اندر چھپائی گئی تھیں،واقعے کے فوراً بعد قومی ایئرلائن کے شعبہ ویجیلنس نے تمام شواہد اور تفصیلات پر مبنی جامع رپور ٹ پی آئی اے کے شعبہ ہیومن ریسورس کو فراہم کی تھی۔
انتظامیہ نے ویجیلنس رپورٹ کی روشنی میں خاتون فضائی میزبان سمیرا آفتاب کو شوکاز نوٹس جاری کردیا ہے معاملے کی تحقیقات شروع کردیں،پی آئی اے انتظامیہ کے مطابق اس واقعے سے قومی ایئرلائن کی ساکھ متاثر ہوئی جس کے باعث فضائی میزبان کو شوکاز نوٹس جاری کیا گیا ہے۔
ذرائع کے مطابق اگر شوکاز نوٹس کا جواب غیر تسلی بخش قرار دیا گیا تو فضائی میزبان سمیرا آفتاب کو ملازمت سے برخاست کرنے پر بھی غور کیا جاسکتا ہے۔