سندھ حکومت نے گندم کی امدادی قیمت 3500 روپے فی من مقرر کردی ہے
وزیراطلاعات سندھ شرجیل انعام میمن کہتے ہیں گندم فروخت کی حد کا خاتمہ اور فی ایکڑ 5 بوری کی شرط ختم کرنا ایک اہم ترین فیصلہ ہے، گندم کی امدادی قیمت 3500 روپے مقرر کرنا اور خریداری کا ہدف 10 لاکھ میٹرک ٹن رکھنا حکومت کی کسان دوست پالیسیوں کا ثبوت ہے۔شرجیل میمن کا کہنا تھا کہ سندھ حکومت کے فیصلے سے چھوٹے آبادگاروں کو براہ راست فائدہ اور کاشتکار بغیر کسی رکاوٹ کے اپنی پیداوار سرکاری مراکز پر فروخت کرسکیں گے۔ان کا کہنا ہے کہ گندم خریداری مہم کو تیز کرنے اور کم خریداری والے اضلاع میں اقدامات کی ہدایات سے ہدف کے حصول کو یقینی بنایا جائے گا۔شرجیل انعام میمن نے کہا کہ آبادگاروں کو ایک دن کے اندر سندھ بینک کے ذریعے فیول سبسڈی کی فراہمی شفافیت اور کارکردگی کی بہترین مثال ہے، اب تک کروڑوں روپے کی بروقت ادائیگیاں ہاریوں کے اعتماد میں اضافے کا سبب بنی ہیں۔