پاکستان کے نائب وزیراعظم اور وزیر خارجہ سینیٹر محمد اسحاق ڈار نے سوئٹزرلینڈ کے وزیر خارجہ اگنازیو کیسس سے ٹیلیفونک رابطہ کیا، جس میں دونوں رہنماؤں نے خطے کی مجموعی صورتحال اور امریکا و ایران کے درمیان جاری سفارتی پیش رفت پر تبادلہ خیال کیا۔
گفتگو کے دوران دونوں وزرائے خارجہ نے امریکا اور ایران کے درمیان مفاہمت کی جانب ہونے والی حالیہ پیش رفت کا خیرمقدم کیا اور اسے خطے میں امن و استحکام کے لیے ایک مثبت اشارہ قرار دیا۔
سوئس وزیر خارجہ نے پاکستان کے کردار کو سراہتے ہوئے کہا کہ پاکستان نے سفارتی رابطوں کو فروغ دینے اور مذاکراتی عمل کو آگے بڑھانے میں اہم اور تعمیری کردار ادا کیا ہے۔ انہوں نے خطے میں امن اور استحکام کے قیام کے لیے پاکستان کی کوششوں کو قابل تعریف قرار دیا۔
اسحاق ڈار نے بھی اس موقع پر پاکستان کے مؤقف اور امن کے لیے جاری سفارتی کوششوں سے آگاہ کیا۔ انہوں نے اس عزم کا اظہار کیا کہ پاکستان علاقائی اور بین الاقوامی سطح پر کشیدگی میں کمی اور مذاکرات کے فروغ کے لیے اپنا مثبت کردار جاری رکھے گا۔
دونوں رہنماؤں نے اس بات پر اتفاق کیا کہ موجودہ صورتحال میں مسلسل رابطے اور سفارتی مشاورت انتہائی اہم ہیں۔ اس مقصد کے لیے پاکستان اور سوئٹزرلینڈ کے درمیان قریبی رابطوں کو برقرار رکھنے پر بھی اتفاق کیا گیا۔
سیاسی مبصرین کے مطابق امریکا اور ایران کے درمیان حالیہ سفارتی پیش رفت کے تناظر میں پاکستان کے کردار کو عالمی سطح پر پذیرائی ملنا ملک کی خارجہ پالیسی اور سفارتی کوششوں کے لیے ایک مثبت پیش رفت تصور کیا جا رہا ہے۔
ماہرین کا کہنا ہے کہ اگر جاری مذاکرات کامیابی سے آگے بڑھتے ہیں تو نہ صرف خطے میں کشیدگی کم ہو سکتی ہے بلکہ عالمی سطح پر معاشی اور سیاسی استحکام کے امکانات بھی مزید روشن ہو جائیں گے۔
پاکستان کی سفارتی کوششوں کو سوئٹزرلینڈ کا خراج تحسین
