کراچی کے علاقے قائد آباد میں نیشنل سائبر کرائم انویسٹیگیشن ایجنسی نے بڑی کارروائی کرتے ہوئے شہریوں کو پولیس اور حساس اداروں کے افسران بن کر لوٹنے والے 3 رکنی گروہ کو گرفتار کر لیا۔
پولیس کے مطابق گرفتار ملزمان میں گروہ کا سرغنہ ابوبکر جبکہ اس کے ساتھی نصیر احمد اور محمد حسن شامل ہیں، جو گزشتہ 7 سال سے مختلف نوعیت کے فراڈ میں ملوث تھے۔ابتدائی تحقیقات کے مطابق ملزمان شہریوں کو فون کالز کے ذریعے خود کو پولیس اور حساس اداروں کا افسر ظاہر کر کے ہراساں کرتے، دھمکاتے اور ان کے بینک اکاؤنٹس سے رقوم منتقل کروا لیتے تھے۔ حکام کا کہنا ہے کہ گروہ اب تک کروڑوں روپے کا فراڈ کر چکا ہے۔
تحقیقات میں یہ بھی سامنے آیا ہے کہ گرفتار افراد آن لائن پروڈکٹس کی فروخت کے نام پر بھی شہریوں سے رقم وصول کرتے رہے۔ اس کے علاوہ وہ بڑی مقدار میں اشیاء کا آرڈر دے کر سامان حاصل کرتے اور ادائیگی کیے بغیر فرار ہو جاتے تھے۔حکام نے انکشاف کیا کہ گروہ مختلف موبائل سمز استعمال کر کے شہریوں کو نشانہ بناتا تھا۔ محمد حسن اور نصیر احمد، جو ایک سیلولر کمپنی فرنچائز سے وابستہ ہیں، سرغنہ ابوبکر کو جعلی ناموں پر سمز فراہم کرتے تھے اور غیر قانونی طور پر سمز ایکٹیویٹ کرنے میں بھی ملوث تھے۔پولیس نے ملزمان کے خلاف مقدمہ درج کر لیا ہے جبکہ مزید تحقیقات اور دیگر ساتھیوں کی گرفتاری کے لیے کارروائی جاری ہے