میکسیکو کی سیکیورٹی فورسز نے ایک بڑی کارروائی کرتے ہوئے بدنام زمانہ جالیسکو نیو جنریشن کارٹیل کے اہم کمانڈر آڈیاس فلورس سلوا عرف ’ایل جارڈینیرو‘ کو گرفتار کر لیا۔ حکام کے مطابق یہ گرفتاری ایک طویل اور خفیہ آپریشن کے بعد عمل میں آئی، جسے منشیات فروش گروہوں کے خلاف جنگ میں اہم پیش رفت قرار دیا جا رہا ہے۔
غیر ملکی میڈیا رپورٹس کے مطابق ملزم کو اس وقت گرفتار کیا گیا جب وہ فرار ہونے کی کوشش میں سڑک کنارے ایک گہری خندق میں چھپ گیا تھا۔ تاہم سیکیورٹی اہلکاروں نے بروقت کارروائی کرتے ہوئے اسے گھیرے میں لے لیا اور حراست میں لے لیا۔
میکسیکن حکام کا کہنا ہے کہ یہ آپریشن ریاست نایاریت میں کیا گیا اور اس کی منصوبہ بندی کئی ماہ سے جاری تھی۔ سیکیورٹی ادارے گزشتہ 19 ماہ سے ملزم کی نقل و حرکت پر نظر رکھے ہوئے تھے، جس کے بعد مناسب وقت پر کارروائی کی گئی۔
آڈیاس فلورس سلوا کو جالیسکو کارٹیل کا اہم ترین رکن اور تنظیم کی طاقت کا بنیادی ستون سمجھا جاتا ہے۔ وہ نہ صرف میکسیکو بلکہ امریکا کو بھی مختلف سنگین جرائم میں مطلوب تھا۔
امریکی حکام نے اس کی گرفتاری میں مدد فراہم کرنے والے کے لیے 50 لاکھ ڈالر کا انعام بھی مقرر کر رکھا تھا۔ ملزم پر عالمی سطح پر منشیات کی اسمگلنگ، قتل اور پرتشدد کارروائیوں میں ملوث ہونے کے الزامات ہیں۔
میکسیکو کی حکومت نے اس کامیابی کو منشیات فروش گروہوں کے خلاف جاری مہم میں بڑی پیش رفت قرار دیتے ہوئے کہا ہے کہ ایسے عناصر کے خلاف کارروائیاں جاری رہیں گی تاکہ ملک میں امن و امان کو بہتر بنایا جا سکے۔
میکسیکو میں خطرناک کارٹیل کمانڈر گرفتار
