ویسٹ انڈیز کے لیجنڈری کرکٹر اور دنیا کے عظیم ترین آل راؤنڈرز میں شمار ہونے والے سر گارفیلڈ سوبرز 89 برس کی عمر میں انتقال کر گئے۔
کرکٹ ویسٹ انڈیز نے ان کے انتقال کی تصدیق کرتے ہوئے انہیں کھیل کی تاریخ کا غیر معمولی کھلاڑی قرار دیا، کرکٹ ویسٹ انڈیز نے جمعہ کو ان کے انتقال کی تصدیق کی، تاہم موت کی وجہ نہیں بتائی گئی،کرکٹ ویسٹ انڈیز کے صدر کشور شیلو نے کہا کہ سر گارفیلڈ سوبرز صرف ایک عظیم کرکٹر نہیں بلکہ وہ شخصیت تھے جنہوں نے عظمت کے مفہوم کو نئی تعریف دی سوبرز کی بیٹنگ، باؤلنگ اور فیلڈنگ میں مہارت بے مثال تھی اور انہوں نے کیریبین کرکٹ کو عالمی سطح پر منفرد شناخت دی۔
28 جولائی 1936 کو بارباڈوس کے شہر برج ٹاؤن میں پیدا ہونے والے سوبرز نے صرف 17 سال کی عمر میں ٹیسٹ کرکٹ میں قدم رکھا انہوں نے 1954 سے1974 تک ویسٹ انڈیز کی نمائندگی کرتےہوئے93 ٹیسٹ میچز میں 8 ہزار 32 رنز، 235 وکٹیں اور 109 کیچز حاصل کیےجبکہ ان کا بیٹنگ اوسط 57.78 رہا انہوں نے 26 ٹیسٹ سنچریاں بھی اسکور کیں اور 39 ٹیسٹ میچز میں ویسٹ انڈیز کی قیادت کی۔
1958 میں پاکستان کے خلاف ناٹ آؤٹ 365 رنز کی تاریخی اننگز نے انہیں عالمی شہرت دلائی، یہ اس وقت ٹیسٹ کرکٹ کا عالمی ریکارڈ تھا جو 36 برس تک برقرار رہا، بعد ازاں برائن لارا نے اسے توڑا سوبرز ٹیسٹ کرکٹ میں 8 ہزار رنز مکمل کرنے والے پہلے کھلاڑی بھی تھے، جبکہ 1968 میں انگلش کاؤنٹی کرکٹ میں ایک اوور میں مسلسل 6 چھکے لگانے والے دنیا کے پہلے فرسٹ کلاس کرکٹر بھی بنے۔
سر گارفیلڈ سوبرز کے انتقال پر انگلینڈ اینڈ ویلز کرکٹ بورڈ، بھارتی کرکٹ بورڈ ،آئی سی سی اور دنیا بھر کی کرکٹ شخصیات نے گہرے رنج و غم کا اظہار کرتے ہوئے انہیں کھیل کی تاریخ کا ناقابلِ فراموش باب قرار دیا۔