ڈیرہ غازی خان میں ’’ستھرا پنجاب‘‘ پروگرام،عوام کو مثالی صفائی ثمرات نظرآنے لگے

ڈیرہ غازی خان (باغی ٹی وی ،سٹی رپورڑ)وزیر اعلیٰ پنجاب کے ویژن ’’ستھرا پنجاب‘‘ کے تحت ڈیرہ غازی خان میں جاری صفائی و ستھرائی پروگرام ایک مثالی اقدام بن چکا ہے، جس کے مثبت اثرات عوام روزمرہ زندگی میں براہِ راست محسوس کر رہے ہیں۔

ڈائیوو ویسٹ مینجمنٹ کے ریجنل منیجر شاہزیب خان اور ریجنل کوآرڈینیٹر عبداللہ عباسی نے میڈیا سے گفتگو کرتے ہوئے کہا کہ پروگرام نے صفائی کے حوالے سے ایک نئی تاریخ رقم کی ہے اور اب اسے عالمی سطح پر بھی سراہا جا رہا ہے۔ ان کے مطابق وہ علاقے جہاں برسوں تک صفائی کا کوئی تصور نہیں تھا، وہاں اب روزانہ کی بنیاد پر گلی محلوں کی صفائی، گھر گھر کوڑا کرکٹ کی کولیکشن، سڑکوں کی صفائی اور فینائل سے دھلائی، اسکولوں کے سامنے صفائی، اور مساجد و قبرستانوں کی باقاعدہ دیکھ بھال یقینی بنائی جا رہی ہے۔

عبداللہ عباسی نے مزید کہا کہ ستھرا پنجاب ایک عالمی معیار کا ادارہ بن چکا ہے، جہاں ڈائیوو ویسٹ مینجمنٹ کے اعلیٰ افسران کی خصوصی نگرانی میں صفائی کے تمام امور انجام دیے جا رہے ہیں، جس کی وجہ سے عوام نظام سے مکمل مطمئن ہیں۔

ڈائیوو ویسٹ مینجمنٹ کے ایچ آر منیجر یعقوب خان نے بتایا کہ محنتی اور ایماندار اہلکاروں کی حوصلہ افزائی کی جا رہی ہے، جبکہ کام نہ کرنے والے یا کرپٹ عناصر کے خلاف سخت کارروائی کے بعد انہیں ادارے سے فارغ کر دیا گیا ہے۔ انہوں نے کہا کہ ستھرا پنجاب میں صرف کارکردگی کی بنیاد پر ترقی کے مواقع فراہم کیے جا رہے ہیں۔

عوامی حلقوں نے وزیر اعلیٰ پنجاب کے ویژن اور ڈائیوو ویسٹ مینجمنٹ کی کارکردگی کو سراہا اور امید ظاہر کی کہ صفائی کا یہ نظام مستقبل میں مزید مؤثر اور بہتر ثابت ہوگا۔