کالاش قبیلے کا سالانہ مذہبی و ثقافتی تہوار ’’اوچاؤ‘‘ اختتام پذیر

چترال:کالاش قبیلے کا سالانہ مذہبی و ثقافتی تہوار ’’اوچاؤ‘‘ روایتی رنگوں اور رسومات کے ساتھ وادی رمبور میں اختتام پذیر ہوگیا۔چترال کی قدیم اور منفرد کالاش تہذیب کے اہم تہوار "اوچاؤ "میں ملکی و غیر ملکی سیاحوں نے بڑی تعداد میں شرکت کی اور کالاش ثقافت کے مختلف رنگوں، روایتی رقص، موسیقی اور رسومات سے لطف اندوز ہوئے۔

اوچاؤ تہوار 21 اگست کو شروع ہوا تھا جو موسم گرما کے اختتام پر گندم، جو اور دیگر فصلوں کی کٹائی مکمل ہونے کی خوشی اور قدرت کی نعمتوں پر اظہار تشکر کے طور پر منایا جاتا ہے۔ تہوار کے دوران کالاش برادری نے اپنی صدیوں پرانی مذہبی روایات، ثقافتی اقدار اور رسم و رواج کو اجاگر کیا۔

تہوار کی روایتی رسومات کے تحت پہاڑی علاقوں سے گندم اور مکھن آبادی تک لایا گیا، جبکہ مکھن ہمسایوں، رشتہ داروں، مہمانوں اور سیاحوں میں خوشی اور محبت کے اظہار کے طور پر تقسیم کیا گیا۔

اس موقع پر نوجوان لڑکے اور لڑکیاں ڈانسنگ ہال میں جمع ہوئے، جہاں روایتی گیت گائے گئے اور مخصوص دھنوں پر رقص کرکے ثقافتی رسومات ادا کی گئیں۔