قطر نے دو ایرانی میزائل تباہ کر دیئے،بحرین میں الجیفر بیس پر دھماکے

قطر نے اسرائیل کی طرف داغے گئے دو ایرانی میزائل گرا دیئے

ایک قطری اہلکار نے تصدیق کی کہ قطر نے اپنے فضائی حدود میں داخل ہونے والے ایران کے دو میزائل مار گرا دیے۔ایرانی میزائلوں کو بروقت نشانہ بنا کر تباہ کر دیا گیا، جس سے کسی بڑے نقصان سے بچاؤ ممکن ہوا۔

ذرائع کے مطابق ایران کی جانب سے ممکنہ جوابی کارروائی کے تناظر میں خلیجی ممالک میں ہائی الرٹ جاری کر دیا گیا ہے۔ متعدد میڈیا رپورٹس میں قطر ،بحرین میں زور دار دھماکوں کی آوازیں سنے جانے کا ذکر کیا گیا ہے۔ یہ مقامات ایسے ہیں جہاں امریکی فوجی اڈے موجود ہیں، جس کے باعث سکیورٹی خدشات مزید بڑھ گئے ہیں۔
ایرانی میزائلوں نے بحرین میں تعینات امریکی نیوی کو نشانہ بنایا ہے، الجیفر بیس پر دھماکوں کے بعد دھواں اٹھتا دیکھا گیا۔غیر ملکی میڈیا کے مطابق ایران کی جانب سے اسرائیل اور امریکی اہداف پر میزائل حملے کیے گئے، بحرین میں دھماکے سنے گئے۔خبر ایجنسی کے مطابق الجیفر میں امریکی نیوی اہلکار تعینات ہیں، بحرین کے
الجفیر بیس سے دھواں اٹھ رہا ہے۔ بحرین نے شہریوں کو فوری طور پر قریبی محفوظ مقامات پر منتقل ہونے کی ہدایت جاری کی ہے۔ وزارت داخلہ نے سوشل میڈیا پیغام میں کہا کہ شہری غیر ضروری نقل و حرکت سے گریز کریں اور سرکاری ہدایات پر عمل کریں۔

ادھر متحدہ عرب امارات نے بھی احتیاطی تدابیر کے تحت اپنی فضائی حدود عارضی طور پر بند کرنے کا اعلان کیا ہے۔ سرکاری خبر رساں ادارے کے مطابق یہ فیصلہ موجودہ سکیورٹی صورتحال کے پیش نظر کیا گیا۔دارالحکومت ابو ظہبی میں دھماکوں کی آوازیں سنے جانے اور شہر کے بعض حصوں سے دھواں اٹھتے دیکھے جانے کی اطلاعات بھی موصول ہوئی ہیں، تاہم حکام کی جانب سے نقصانات کی نوعیت اور ہدف کے بارے میں تاحال کوئی تفصیلی بیان جاری نہیں کیا گیا۔