مشرقِ وسطیٰ میں جاری ایران جنگ کے دوران امریکی فوج کو ایک اور بڑا نقصان اٹھانا پڑا ہے، جس کے بعد ہلاک ہونے والے امریکی فوجیوں کی مجموعی تعداد 11 تک پہنچ گئی ہے۔
امریکی نشریاتی ادارے سی این این کے مطابق جمعرات کو مغربی عراق میں امریکی فضائیہ کا ایک ری فیولنگ طیارہ حادثے کا شکار ہوگیا، جس کے نتیجے میں عملے کے چار ارکان ہلاک ہوگئے۔ اس حادثے کے بعد ایران جنگ میں ہلاک ہونے والے امریکی فوجیوں کی تعداد بڑھ کر 11 ہوگئی ہے۔امریکی سینٹرل کمانڈ کے مطابق حادثے کے وقت طیارے میں چھ افراد سوار تھے۔ چار افراد کی ہلاکت کی تصدیق ہوچکی ہے جبکہ دو دیگر اہلکار لاپتہ ہیں جن کی تلاش کے لیے ریسکیو آپریشن جاری ہے۔
حادثے کا شکار ہونے والا طیارہ Boeing KC-135 Stratotanker تھا جو امریکی فضائیہ کے ری فیولنگ مشنز کے لیے استعمال کیا جاتا ہے۔ ابتدائی بیان میں امریکی فوج نے کہا ہے کہ حادثہ نہ تو دشمن کی فائرنگ اور نہ ہی فرینڈلی فائر کا نتیجہ تھا بلکہ اس میں ایک دوسرے امریکی ٹینکر طیارے کا بھی کردار بتایا جا رہا ہے۔ واقعے کی مکمل تحقیقات جاری ہیں۔
اس سے قبل یکم مارچ کو حملے میں چھ امریکی فوجی ہلاک ہوگئے تھے، جبکہ ایک اور فوجی سعودی عرب میں رواں ماہ کے اوائل میں ہونے والے حملے میں زخمی ہونے کے بعد ہفتہ کو دم توڑ گیا تھا۔