لاہور میں گزشتہ پانچ برس کے دوران اغوا کی جانے والی خواتین سے متعلق ایک تشویشناک رپورٹ سامنے آئی ہے، جس کے مطابق 824 خواتین کا اب تک کوئی سراغ نہیں مل سکا۔
نجی ٹی وی کی رپورٹ میں کہا گیا ہے کہ پولیس ریکارڈ کے مطابق یہ خواتین 2021 سے 2025 کے درمیان مختلف علاقوں سے اغوا ہوئیں، تاہم تمام تر کوششوں کے باوجود ان کی بازیابی ممکن نہیں ہو سکی۔رپورٹ میں بتایا گیا ہے کہ سب سے زیادہ اغوا کے واقعات کینٹ ڈویژن میں رپورٹ ہوئے، جہاں 282 خواتین تاحال لاپتا ہیں۔ اس کے علاوہ صدر ڈویژن سے 152، سٹی ڈویژن سے 124، ماڈل ٹاؤن ڈویژن سے 110 اور اقبال ٹاؤن ڈویژن سے 100 خواتین کا بھی کوئی سراغ نہیں مل سکا۔مزید برآں، سول لائنز ڈویژن سے اغوا ہونے والی 56 خواتین بھی اب تک بازیاب نہیں ہو سکیں۔
پولیس حکام کے مطابق تمام واقعات کے مقدمات درج کیے گئے تھے، تاہم تحقیقات کے باوجود مغوی خواتین کے بارے میں کوئی ٹھوس معلومات سامنے نہیں آ سکیں۔ماہرین کا کہنا ہے کہ بڑھتے ہوئے اغوا کے واقعات شہریوں میں عدم تحفظ کے احساس کو بڑھا رہے ہیں، جبکہ اس مسئلے سے نمٹنے کے لیے قانون نافذ کرنے والے اداروں کو مزید مؤثر حکمت عملی اپنانے کی ضرورت ہے۔