لاہور کی کوٹ لکھپت جیل میں قید پاکستان تحریک انصاف (پی ٹی آئی) کی کارکن صنم جاوید کی طبیعت خراب ہونے پر انہیں ہسپتال منتقل کر دیا گیا ہے، جس کے بعد ان کی صحت سے متعلق تشویش میں اضافہ ہو گیا ہے۔
نجی ٹی وی ایکسپریس نیوز کے مطابق صنم جاوید کو گزشتہ روز آنکھوں اور معدے میں شدید تکلیف کی شکایت ہوئی، جس کے بعد جیل انتظامیہ نے فوری طور پر انہیں لاہور کے جناح ہسپتال منتقل کیا۔ اسپتال ذرائع کے مطابق ابتدائی طبی معائنے کیے جا رہے ہیں، تاہم ان کی حالت اور بیماری کی نوعیت کے بارے میں تاحال تفصیلی معلومات سامنے نہیں آ سکیں۔
صنم جاوید کے شوہر نے میڈیا سے گفتگو کرتے ہوئے بتایا کہ ان کی اہلیہ کو اچانک شدید درد اور تکلیف محسوس ہوئی جس پر انہیں فوری طور پر ہسپتال لے جایا گیا۔ ان کا کہنا تھا کہ انہیں خدشہ ہے کہ جیل میں مناسب طبی سہولیات نہ ہونے کے باعث ان کی طبیعت زیادہ خراب ہوئی ہو۔یاد رہے کہ صنم جاوید کو 9 مئی کے واقعات سے متعلق درج مقدمات میں عدالت کی جانب سے 5 سال قید کی سزا سنائی گئی تھی، جس کے بعد وہ لاہور کی کوٹ لکھپت جیل میں قید ہیں۔