کراچی میں گرفتار بدنام زمانہ منشیات ڈیلر انمول عرف پنکی کے خلاف تحقیقات میں ایک اور چونکا دینے والا انکشاف سامنے آیا ہے۔ پولیس رپورٹ کے مطابق ملزمہ کا نیٹ ورک پوش علاقوں کے نجی تعلیمی اداروں میں کم عمر طلبہ کو منشیات کی لت میں مبتلا کرنے کے لیے منظم انداز میں سرگرم تھا۔
ایڈیشنل ڈسٹرکٹ اینڈ سیشن جج جنوبی کی عدالت میں مقدمے کی سماعت کے دوران پولیس نے ملزمہ کے نیٹ ورک سے متعلق تفصیلی رپورٹ جمع کرائی، جسے عدالت نے ریکارڈ کا حصہ بنا لیا۔
رپورٹ کے مطابق انمول پنکی کا گینگ نجی اسکولوں اور کالجوں کے طلبہ کو خاص طور پر نشانہ بنا رہا تھا۔ پولیس نے عدالت کو بتایا کہ نوجوانوں اور کم عمر بچوں کو ابتدا میں “رعایتی پیکجز” دے کر منشیات کا عادی بنانے کی کوشش کی جاتی تھی تاکہ وہ مستقل خریدار بن جائیں۔
تحقیقات میں یہ بھی انکشاف ہوا کہ جو طلبہ زیادہ مقدار میں منشیات خریدتے تھے، انہیں خصوصی رعایت اور سہولت دی جاتی تھی۔ پولیس کے مطابق یہ حکمت عملی نوجوانوں کو جلد نشے کی لت میں مبتلا کرنے کے لیے استعمال کی جا رہی تھی۔
پولیس نے عدالت سے مؤقف اختیار کیا کہ تعلیمی اداروں میں منشیات کے پھیلاؤ کو روکنے کے لیے ملزمہ سے مزید تفتیش انتہائی ضروری ہے۔ رپورٹ میں کہا گیا کہ انمول پنکی کی نشاندہی پر ان سہولت کاروں کی شناخت بھی کرنا مقصود ہے جو تعلیمی اداروں کے اندر بیٹھ کر اس نیٹ ورک کی مدد کر رہے تھے۔
حکام کے مطابق اس منشیات نیٹ ورک کی جڑیں پوش علاقوں کے تعلیمی اداروں تک پھیلی ہوئی ہیں، جس کے باعث والدین اور تعلیمی حلقوں میں شدید تشویش پائی جا رہی ہے۔
پولیس کا کہنا ہے کہ ملزمہ کی گرفتاری کے بعد اب ان تمام افراد کے گرد گھیرا تنگ کیا جا رہا ہے جو نوجوان نسل کو اس خطرناک کاروبار کا شکار بنا رہے تھے۔
کراچی میں منشیات نیٹ ورک کا خوفناک انکشاف، طلبہ کو رعایتی پیکجز پر کوکین فروخت کیے جانے کا دعویٰ
