بھارت میں ہونے والی آئی سی سی بورڈ میٹنگ اور آئی پی ایل فائنل میں شرکت کے لیے پاکستان کرکٹ بورڈ کے چیئرمین محسن نقوی کو باضابطہ دعوت نامہ موصول ہو گیا ہے، تاہم ان کے بھارت جانے یا نہ جانے کا حتمی فیصلہ وزیرِ اعظم شہباز شریف کریں گے۔
کرکٹ ویب سائٹ کے مطابق انٹرنیشنل کرکٹ کونسل کے اجلاس رواں ماہ دو مراحل میں منعقد ہوں گے۔ آئی سی سی کی چیف ایگزیکٹو کمیٹی کا ورچوئل اجلاس 21 مئی کو ہوگا جبکہ بورڈ میٹنگ 30 اور 31 مئی کو بھارتی شہر احمد آباد میں منعقد کی جائے گی۔ذرائع کے مطابق آئی سی سی اجلاس میں ورلڈ ٹیسٹ چیمپئن شپ کے موجودہ فارمیٹ میں ممکنہ تبدیلیوں پر غور کیا جائے گا۔ موجودہ نظام کے تحت ہر سیریز میں کم از کم دو ٹیسٹ میچز کھیلنا لازمی قرار دیا گیا ہے۔اجلاس میں ورلڈ ٹیسٹ چیمپئن شپ میں زمبابوے، آئر لینڈ اور افغانستان کو شامل کرنے کی تجویز بھی زیرِ غور آئے گی۔
ذرائع کا کہنا ہے کہ آئی سی سی بورڈ میٹنگ اور آئی پی ایل فائنل میں شرکت کے حوالے سے محسن نقوی کی بھارت روانگی کا فیصلہ حکومتی سطح پر کیا جائے گا۔