سینیٹ نے فیملی کورٹس ترمیمی بل منظور کرلیا، نان و نفقہ کے مقدمات میں خواتین اور بچوں کو بڑا ریلیف مل گیا، عدالتوں کو پہلی ہی پیشی پر نان نفقہ مقرر کرنے کا پابند کردیا گیا۔
نان و نفقہ کے مقدمات میں خواتین اور بچوں کیلئے بڑا ریلیف، سینیٹ سے فیملی کورٹس ترمیمی بل 2026ء منظور کرلیا گیا۔،خواتین کی بڑی مشکل آسان کر دی گئی،اسلام آباد کی حد تک فیملی کورٹس ایکٹ 1964ء میں بڑی ترمیم منظور کرلی گئی۔ترمیم کے مطابق ہر مہینے کی 14 تاریخ تک نان نفقہ ادا نہ کرنے پر شوہر کا حق دفاع ختم ہوجائے گا، خرچہ ادا نہ کرنے پر فیملی کورٹ خاتون کے حق میں ڈگری جاری کرے گی۔
علاوہ ازیں سینیٹر کامران مرتضی نے آئینِ پاکستان میں 28ویں آئینی ترمیم کا بل سینیٹ سیکرٹریٹ میں جمع کرا دیا۔ ترمیمی بل میں آئین کے آرٹیکل 260 میں تبدیلی کی تجویز دی گئی ہے، جس کے تحت آئین میں "سرکاری گزٹ” کی باضابطہ تعریف شامل کی جائے گی۔ بل کے متن کے مطابق "اوتھ” یعنی حلف کی تعریف کے بعد "سرکاری گزٹ” کی تعریف درج کرنے کی تجویز دی گئی ہے، جبکہ وفاقی حکومت کی اتھارٹی کے تحت شائع ہونے والے گزٹ کو "سرکاری گزٹ” قرار دیا جائے گا۔ بل میں یہ بھی تجویز ہے کہ کسی صوبے، ریاست یا وفاقی علاقے کی اتھارٹی سے شائع ہونے والا گزٹ بھی آفیشل گزٹ تصور ہوگا۔ بل کے اغراض و مقاصد میں کہا گیا ہے کہ آئین، قوانین اور مختلف آرڈرز میں "آفیشل گزٹ” کی اصطلاح بار بار استعمال ہوئی ہے، تاہم آئین میں اس کی واضح تعریف موجود نہیں، جو ایک غیر معمولی قانونی ابہام ہے۔ ترمیمی بل کا مقصد اسی قانونی سقم کو دور کرنا ہے۔ کامران مرتضی نے یہ بل نجی حیثیت میں جمع کرایا۔