وفاقی دارالحکومت اسلام آباد میں شدید گرمی کے دوران اسلام آباد ہائی کورٹ میں بجلی کی طویل بندش کے باعث عدالتی امور بری طرح متاثر ہوئے، جبکہ وکلاء، سائلین اور عدالتی عملے کو شدید مشکلات کا سامنا کرنا پڑا۔
ذرائع کے مطابق اسلام آباد ہائی کورٹ میں تقریباً ڈیڑھ گھنٹے تک بجلی معطل رہی، جس کے باعث مختلف کورٹ رومز اندھیرے میں ڈوب گئے۔ صورتحال کے پیشِ نظر کورٹ رومز کے دروازے کھول دیے گئے تاکہ ہوا کی آمد و رفت کو ممکن بنایا جا سکے اور گرمی کی شدت میں کچھ کمی لائی جا سکے۔بجلی کی بندش اور حبس کے باعث وکلاء اور سائلین عدالتوں کے باہر انتظار کرنے پر مجبور رہے، جبکہ عدالتی عملے کو کیسز کی تیاری اور دفتری امور انجام دینے میں بھی شدید دشواری کا سامنا کرنا پڑا۔بعد ازاں تقریباً ڈیڑھ گھنٹے بعد اسلام آباد ہائی کورٹ کی بجلی بحال کر دی گئی، جس کے بعد عدالتی سرگرمیاں بتدریج معمول پر آنا شروع ہو گئیں۔