چین کی نیشنل پیپلز کانگریس کے نائب چیئرمین کائی دافنگ کی قیادت میں چینی پارلیمانی وفد پارلیمنٹ ہاؤس پہنچا جہاں سینیٹ چیئرمین سید یوسف رضا گیلانی نے وفد کا پرتپاک استقبال کیا۔
ملاقات کے دوران پاکستان اور چین کے دوطرفہ تعلقات، پارلیمانی روابط اور باہمی تعاون کے مختلف شعبوں پر تفصیلی تبادلہ خیال کیا گیا۔
دونوں رہنماؤں نے پارلیمانی تعاون کو مزید مضبوط بنانے اور دونوں ممالک کے درمیان قریبی روابط جاری رکھنے کے عزم کا اعادہ کیا۔
سینیٹ چیئرمین یوسف رضا گیلانی نے وفد کی آمد کو خوش آئند قرار دیتے ہوئے کہا کہ پاکستان اور چین کی دوستی ہر آزمائش میں مضبوط ثابت ہوئی ہے۔
چینی وفد نے پاکستانی مہمان نوازی اور پرتپاک استقبال کو سراہا جبکہ وفد کے اراکین نے پارلیمنٹ ہاؤس میں وزیٹرز بک میں اپنے تاثرات بھی قلمبند کیے۔
بعد ازاں سینیٹ چیئرمین کی جانب سے چینی وفد کے اعزاز میں ظہرانہ بھی دیا گیا جس میں وفاقی وزراء اور اراکین پارلیمنٹ نے شرکت کی۔
ملاقات کو پاک چین تعلقات اور پارلیمانی سفارتکاری کیلئے اہم پیش رفت قرار دیا جا رہا ہے۔
چینی پارلیمانی وفد کی پارلیمنٹ ہاؤس آمد، پاک چین تعلقات مزید مضبوط بنانے پر اتفاق
