وزیراعظم محمد شہباز شریف نے بیجنگ میں آئی بی آئی کارپوریشن کے ہیڈکوارٹرز کا دورہ کیا۔
اس سے قبل آئی بی آئی پہنچنے پر فینگتائی ڈسٹرکٹ کے پارٹی سیکریٹری مسٹر وانگ شاؤفینگ اور آئی بی آئی کے صدر مسٹر چیان شیاو جون نے وزیراعظم کا استقبال کیا۔ اس موقع پر خطاب کرتے ہوئے وزیر اعظم نے کہا پاک چین اقتصادی اور تکنیکی تعاون کو مزید وسعت دینے کے عزم کا اعادہ کیا۔ انھوں نے پاکستان اور چین کے درمیان دوطرفہ تجارت اور سرمایہ کاری کے فروغ دینے کے ساتھ دونوں ممالک کی کاروباری برادریوں کے درمیان ادارہ جاتی روابط کو وسعت دینے کی اہمیت پر زور دیا۔ محمد شہباز شریف نے کہا کہ پاکستان چینی کمپنیوں کو اپنے کاروبار کے فروغ اور توسیع کے لیے بھرپور تعاون فراہم کرے گا اور دونوں ممالک کے درمیان اقتصادی، تجارتی اور تکنیکی روابط کو مزید مضبوط بنایا جائے گا۔
وزیر اعظم نے کہا کہ سی پیک 2.0 کے تحت مصنوعی ذہانت (AI) اور انفارمیشن ٹیکنالوجی پاکستان کے چار اہم ترین ترجیحی پروگراموں میں شامل ہیں، جنہیں حکومت تیز رفتاری سے آگے بڑھا رہی ہے۔تقریب میں موجود نوجوان شرکاء کو مخاطب کرتے ہوئے وزیراعظم نے انہیں باصلاحیت کاروباری شخصیات اور اپنے شعبوں کے ماہرین قرار دیا اور کہا کہ حکومتِ پاکستان نوجوانوں کو فنی تربیت اور مختلف شعبوں میں مہارتیں فراہم کرنے کے لیے وسیع پیمانے پر اقدامات کر رہی ہے۔ وزیراعظم نے مزید کہا کہ سی پیک 2.0 کے تحت خصوصی اقتصادی زونز (SEZS) میں سرمایہ کاری کے وسیع مواقع موجود ہیں۔ انہوں نے چینی سرمایہ کاروں کو کراچی میں پورٹ قاسم کے قریب قائم پہلے خصوصی اقتصادی زون کا دورہ کرنے کی دعوت دی ۔ چین پاکستان صنعتی تعاون کے فروغ اور سرحد پار صنعتی راہداریوں سے متعلق موضوعاتی اجلاس میں 150 سے زائد کمپنیوں اور ان کے نمائندوں نے شرکت کی۔
بیجنگ میں اکیڈمی آف ایگری کلچرل سائنسنز کے دورے کے موقع پر اکیڈمی کے صدر پروفیسر ہووانگ شان وین نے وزیراعظم محمدشہبازشریف کو پروفیسر شپ کی اعزازی ڈگری سے نوازا ۔انیس سوستاون میں قائم ہونے والی یہ اکیڈمی چین کی زرعی اورمعاشی ترقی میں کلیدی کردار ادا کررہی ہے ۔اس موقع پر وزیراعظم نے اکیڈمی کے صدر پروفیسر ہووانگ شان وین کاشکریہ ادا کرتےہوئے کہاکہ یہ نہ صرف میرے لئے بلکہ پوری قوم کیلئے ایک اعزاز ہے۔اس موقع پر وزیراعظم محمدشہبازشریف کو ادارے کے بارے میں تفصیلی بریفنگ دی گئی ۔وزیراعظم کو بتایاگیاکہ اکیڈمی آف ایگری کلچرل سائنسنز نے زرعی سائنس کے ممتاز ماہرین تیار کئے ہیں جو چین کے زرعی شعبے کی ترقی میں اہم کردار ادا کررہےہیں ۔
وزیراعظم محمدشہبازشریف نے چین کےشہر بیجنگ میں چائنیز اکیڈمی آف ایگری کلچرل سائنسز کے دورے کے موقع پر تقریب سےخطاب کرتےہوئے کہاہے کہ آئی ٹی اورمصنوعی ذہانت جیسے اہم ٹولز کی موجودگی کے باوجود زرعی شعبے کو ترقی دے کر ہی معاشی ترقی کے اہداف حاصل کئے جاسکتے ہیں ۔وزیراعظم نے کہاکہ مستقبل کو محفوظ اور نوجوانوں کو بااختیار بنانے کیلئے ضروری ہے کہ پاکستان میں زرعی انقلاب برپاکیاجائے۔چین کی مدد سے پاکستان زرعی تحقیقی مراکز کو جدید خطوط پراستوار کرنے کا خواہاں ہے ۔چائنیز اکیڈمی آف ایگری کلچرل سائنسز کے تعاون سے ہمارے سائنسدان ،انجینئرز اور کسان شاندار نتائج دے سکتے ہیں ۔