ملک بھر میں عیدالاضحیٰ آج مذہبی جوش وجذبے سے منائی جا رہی ہے

فیلڈ مارشل عاصم منیر، ایئر چیف اور نیول چیف نے قوم کو عیدالاضحیٰ کی مبارکباد دی ہے آئی ایس پی آر نے کہا کہ مسلح افواج ملک میں دیرپا امن، خوشحالی اور قومی یکجہتی کیلئے دعاگو ہیں۔ افواج ملک کی خودمختاری اور علاقائی سالمیت کے دفاع کیلئے پرعزم ہیں، عیدالاضحیٰ قربانی، ایمان اور یکجہتی کی علامت ہےمسلح افواج کے سربراہان نے عیدالاضحیٰ کے موقع پر شہدائے پاکستان کے اہلِ خانہ کو خصوصی خراجِ عقیدت پیش کرتے ہوئے کہا کہ شہدا کی قربانیوں نے وطنِ عزیز کی بنیادوں کو مزید مضبوط بنایا ہے۔

صدر آصف زرداری اور وزیر اعظم شہباز شریف نے عید الاضحیٰ پر قوم اور امت مسلمہ کو دلی مبارکباد دی۔

اپنے بیان میں صدر آصف علی زرداری نے کہا کہ عیدالاضحیٰ اطاعت الہٰی، صبر، وفا، اخلاص اور ایثار کا درس دیتی ہے نفرت اور تقسیم کے بجائے محبت، برداشت اور مکالمے کو فروغ دیں، مایوسی کے اندھیروں کو خدمت، علم، محنت اور اتحاد کی روشنی سے شکست دی جاسکتی ہے۔

وزیر اعظم شہباز شریف نے عیدالاضحیٰ 10 ذوالحجہ 1447 ہجری کے موقع پر قوم اور امت مسلمہ کو دلی مبارکباد دیتے ہوئے کہا ہے کہ یہ عید حضرت ابراہیم علیہ السلام اور حضرت اسماعیل علیہ السلام کی عظیم قربانی اور اطاعت کی یاد دلاتی ہے عیدالاضحیٰ ہمیں قربانی، ایثار، ہمدردی اور انسانیت کی خدمت کا درس دیتی ہے اور حقیقی ایمان یہی ہے کہ انسان اپنے ذاتی مفادات کو اعلیٰ مقاصد کے لیے قربان کرے۔

وزیر اعظم نے کہا کہ شہداء کی قربانیاں وطن عزیز کا فخر ہیں، جبکہ دہشت گردی کے خلاف جان دینے والے افراد قوم کے ہیرو ہیں انہوں نے قوم سے اپیل کی کہ عید کے موقع پر غرباء، مساکین اور مستحق افراد کو بھی خوشیوں میں شامل کیا جائے تاکہ معاشرے میں اتحاد اور یگانگت کو فروغ ملے وزیر اعظم نے فلسطین اور مقبوضہ کشمیر کے مظلوم عوام سے مکمل یکجہتی کا اظہار کرتے ہوئے دعا کی کہ اللہ تعالیٰ پوری دنیا کو امن، محبت اور بھائی چارے کا گہوارہ بنائے۔

وزیراعلیٰ پنجاب مریم نواز نے عیدالاضحیٰ کے موقع پر پوری قوم اور امتِ مسلمہ کو دلی مبارکباد پیش کرتے ہوئے کہا ہے کہ عید قربانی، ایثار، محبت اور انسانیت کے جذبے کو فروغ دینے کا پیغام دیتی ہے۔

وزیراعلیٰ پنجاب کا اپنے پیغام میں کہنا تھا کہ حضرت ابراہیم علیہ السلام کی عظیم سنت پر عمل کرتے ہوئے قربانی کرنے والے ہر مسلمان قابلِ احترام ہیں، عیدالاضحیٰ ہمیں اللہ تعالیٰ کی رضا کے لیے اپنی خواہشات قربان کرنے اور نادار طبقے کو خوشیوں میں شریک کرنے کا درس دیتی ہےمریم نواز نے عید کے موقع پر ملک کی سرحدوں پر تعینات افواجِ پاکستان کے جوانوں کو زبردست خراجِ تحسین پیش کرتے ہوئے کہا کہ قوم اپنے بہادر سپاہیوں کی قربانیوں کو ہمیشہ یاد رکھے گی۔

انہوں نے یومِ عید پر صفائی آپریشن اور دیگر عوامی خدمات انجام دینے والے افسران اور عملے کی کارکردگی کو بھی سراہا اور انہیں شاباش دی وزیراعلیٰ پنجاب نے شہداء کے خاندانوں سے اظہارِ یکجہتی کرتے ہوئے کہا کہ قوم اپنے شہداء اور ان کے اہلِ خانہ کی قربانیوں کی مقروض ہے، مریم نواز نے اسرائیلی جارحیت کا شکار ہونے والی کمسن طالبات سمیت تمام شہداء کی عظیم قربانیوں کو سلام پیش کیا اور عالمی برادری سے مظلوموں کے حق میں آواز بلند کرنے کی اپیل کی۔

وفاقی وزیر داخلہ محسن نقوی نے امت مسلمہ کو عید الاضحیٰ کی مبارکباد دی ہے۔

وفاقی وزیر داخلہ محسن نقوی نے کہاکہ عیدالاضحیٰ ایثار، قربانی، محبت اور اطاعت الہٰی کا عظیم پیغام ہے، حضرت ابراہیمؑ اور حضرت اسماعیلؑ نے اللہ کی رضا کے لئے وفا اور بندگی کی اعلیٰ مثال قائم کی اپنی خواہشات اور انا کو اللہ کی رضا کے لئے قربان کرنا ہی بڑی عید کا بڑا پیغام ہے، عید الاضحیٰ پر شہدائے وطن اور ان کے عظیم خاندانوں کو سلام عقیدت پیش کرتا ہوں۔

انہوں نے مزید کہا کہ وطن عزیز پر جانیں نچھاور کرنے والے بہادر سپوت قوم کے حقیقی ہیرو ہیں جن کی قربانیوں کو کسی ترازو میں نہیں تولا جاسکتا، آج بھی قوم کے محافظ وطن کی حفاظت کیلئے اپنے پیاروں سے دور عید منا رہے ہیں