قصور
بلھے شاہ سب ڈویژن واپڈا کی طویل لوڈشیڈنگ، شہری شدید پریشان
قصور بلھے شاہ سب ڈویژن کوٹ غلام محمد خان اور گردونواح کے علاقوں میں غیر اعلانیہ اور طویل دورانیے کی لوڈشیڈنگ عوام کے لیے عذاب بن گئی۔ متعدد علاقوں میں کئی کئی گھنٹے بجلی کی بندش کے باعث شہریوں کو شدید مشکلات کا سامنا کرنا پڑ رہا ہے
علاقہ مکینوں کا کہنا ہے کہ شدید گرمی کے موسم میں بجلی کی بار بار اور طویل بندش نے معمولات زندگی مفلوج کر دیے ہیں
شہریوں نے شکایت کی کہ عید الاضحیٰ کے ایام میں بھی بجلی کی فراہمی مسلسل متاثر رہی جس کے باعث لوگوں کو شدید ذہنی اذیت اور پریشانی کا سامنا کرنا پڑا۔
شہریوں کا کہنا ہے کہ واپڈا حکام کی جانب سے لوڈشیڈنگ کے اوقات کار کے بارے میں کوئی واضح شیڈول جاری نہیں کیا جاتا، جس کے باعث گھریلو صارفین، کاروباری حضرات اور طلبہ شدید متاثر ہو رہے ہیں۔
اہل علاقہ نے اعلیٰ واپڈا حکام اور متعلقہ انتظامیہ سے مطالبہ کیا ہے کہ بلھے شاہ سب ڈویژن کوٹ غلام محمد خان اور ملحقہ علاقوں میں بجلی کی غیر اعلانیہ لوڈشیڈنگ کا فوری نوٹس لیا جائے اور عوام کو ریلیف فراہم کرنے کے لیے مؤثر اقدامات کیے جائیں