وفاقی تحقیقاتی ادارے (ایف آئی اے) نے پاکستان اسٹیل ملز میں مبینہ مالی بے ضابطگیوں، بدانتظامی اور اربوں روپے کے نقصان سے متعلق جاری تحقیقات کے سلسلے میں اہم پیش رفت کرتے ہوئے متعلقہ افسران کو طلب کر لیا ہے۔
ذرائع کے مطابق ایف آئی اے پاکستان اسٹیل ملز میں مبینہ طور پر 284 ارب روپے کے نقصان کے معاملے کی تحقیقات کر رہا ہے۔ یہ تحقیقات انسدادِ منی لانڈرنگ ایکٹ کے تحت جاری ہیں، جن کا مقصد مالی بے ضابطگیوں اور ممکنہ غیر قانونی سرگرمیوں کے مختلف پہلوؤں کا جائزہ لینا ہے۔
اس سلسلے میں ایف آئی اے نے پاکستان اسٹیل ملز کے فوکل پرسن کو باضابطہ خط جاری کیا ہے، جس میں متعلقہ افسران کی پیشی کو یقینی بنانے کی ہدایت کی گئی ہے۔ ادارے کی جانب سے تحقیقات میں مکمل تعاون کی بھی درخواست کی گئی ہے۔
ذرائع کا کہنا ہے کہ ایف آئی اے کے کارپوریٹ کرائم سرکل نے 12 افسران کو طلب کیا ہے، جو ماضی میں پاکستان اسٹیل ملز میں پیش آنے والے چھ بڑے واقعات اور ان سے متعلق انکوائریوں کا حصہ رہے ہیں۔ ان افسران سے مختلف معاملات پر معلومات اور ریکارڈ حاصل کیا جائے گا۔
تحقیقاتی ذرائع کے مطابق انکوائری کا مقصد یہ جاننا ہے کہ مبینہ مالی نقصان اور انتظامی بے ضابطگیوں کے اسباب کیا تھے، اور آیا کسی مرحلے پر قوانین یا ضابطوں کی خلاف ورزی تو نہیں ہوئی۔ اس مقصد کے لیے ماضی کی رپورٹس، دستاویزات اور انکوائری ریکارڈ کا بھی جائزہ لیا جا رہا ہے۔
پاکستان اسٹیل ملز کئی برسوں سے مالی مشکلات اور انتظامی مسائل کا شکار رہی ہے۔ ماہرین کا کہنا ہے کہ قومی ادارے کی بحالی اور شفافیت کو یقینی بنانے کے لیے ایسے معاملات کی مکمل اور غیر جانبدارانہ تحقیقات ضروری ہیں۔
پاکستان اسٹیل ملز میں 284 ارب کے مبینہ نقصان کی تحقیقات تیز
