اسلام آباد: وفاقی وزیر مواصلات عبدالعلیم خان سے سعودی پاکستان بزنس کونسل کے چیئرمین پرنس منصور بن محمد السعود نے ملاقات کی، جس میں باہمی دلچسپی کے مختلف امور اور پاکستان و سعودی عرب کے درمیان دوطرفہ تعلقات کے فروغ پر تفصیلی تبادلہ خیال کیا گیا۔
ملاقات کے دوران وفاقی وزیر عبدالعلیم خان نے سعودی وفد کو موٹرویز کے مختلف منصوبوں میں سرمایہ کاری کی خصوصی پیشکش کرتے ہوئے کہا کہ یہ منصوبے مواصلات کے شعبے میں تجارتی اور اقتصادی لحاظ سے انتہائی اہمیت کے حامل ہیں۔ انہوں نے یقین دہانی کرائی کہ سعودی سرمایہ کاروں کو پاکستان میں ہر ممکن سہولیات فراہم کی جائیں گی تاکہ سرمایہ کاری کے مواقع سے بھرپور استفادہ کیا جا سکے۔عبدالعلیم خان کا کہنا تھا کہ پاکستان اہم ترقیاتی منصوبوں میں سعودی عرب کی شراکت کو قدر کی نگاہ سے دیکھتا ہے اور سعودی پاکستان بزنس کونسل کے پلیٹ فارم سے دونوں برادر ممالک کے درمیان اقتصادی اور تجارتی تعلقات مزید مضبوط ہوں گے۔
اس موقع پر پرنس منصور بن محمد السعود نے کہا کہ سعودی پاکستان بزنس کونسل پاکستان کے مواصلاتی شعبے میں شراکت داری اور سرمایہ کاری کے مواقع میں گہری دلچسپی رکھتی ہے۔ انہوں نے دونوں ممالک کے درمیان کاروباری تعاون کو فروغ دینے کے عزم کا اظہار کرتے ہوئے کہا کہ مشترکہ منصوبے خطے میں اقتصادی ترقی اور باہمی خوشحالی کے لیے سودمند ثابت ہوں گے۔ملاقات میں پاکستان اور سعودی عرب کے درمیان سرمایہ کاری، انفراسٹرکچر اور مواصلات کے شعبوں میں تعاون کو مزید وسعت دینے پر بھی اتفاق کیا گیا۔