انٹرنیشنل کرکٹ کونسل (آئی سی سی) نے ون ڈے ورلڈ کپ 2027 کے شیڈول اور میزبانی کے حوالے سے اہم تفصیلات جاری کر دی ہیں۔ دنیا کے سب سے بڑے کرکٹ ایونٹس میں سے ایک یہ ٹورنامنٹ 4 اکتوبر 2027 سے شروع ہوگا اور 21 نومبر 2027 تک جاری رہے گا۔
آئی سی سی کے مطابق میگا ایونٹ کی مشترکہ میزبانی جنوبی افریقا، زمبابوے اور نمیبیا کریں گے۔ ٹورنامنٹ میں دنیا کی 14 بہترین ٹیمیں شرکت کریں گی جبکہ دفاعی چیمپئن آسٹریلیا اپنی عالمی ٹائٹل کا دفاع کرے گا۔
ورلڈ کپ کے دوران مجموعی طور پر 54 میچز کھیلے جائیں گے۔ ان میں سے 41 میچز جنوبی افریقا، 10 زمبابوے اور 3 نمیبیا میں منعقد ہوں گے۔ اس طرح جنوبی افریقا ایونٹ کا مرکزی میزبان ملک ہوگا جبکہ دیگر دو ممالک بھی اہم میچز کی میزبانی کریں گے۔
جنوبی افریقا کے آٹھ بڑے شہروں کو میچز کی میزبانی سونپی گئی ہے جن میں جوہانسبرگ، پریٹوریا، کیپ ٹاؤن، ڈربن، بلوئم فونٹین، ایسٹ لندن، پارل اور گیبرہا شامل ہیں۔ ان میدانوں میں عالمی کرکٹ کے بڑے مقابلے منعقد ہوں گے اور شائقین کو اعلیٰ معیار کی کرکٹ دیکھنے کا موقع ملے گا۔
ٹورنامنٹ کے فارمیٹ کے مطابق 14 ٹیموں کو دو گروپس میں تقسیم کیا جائے گا۔ ہر گروپ کی ٹاپ تین ٹیمیں اگلے مرحلے "سپر 6” کے لیے کوالیفائی کریں گی۔ اس مرحلے کے بعد بہترین کارکردگی دکھانے والی ٹیمیں سیمی فائنل اور پھر فائنل میں جگہ بنائیں گی۔
کرکٹ ماہرین کے مطابق 14 ٹیموں پر مشتمل فارمیٹ سے زیادہ ممالک کو عالمی سطح پر اپنی صلاحیتوں کے اظہار کا موقع ملے گا، جبکہ مقابلوں میں دلچسپی اور مسابقت بھی بڑھے گی۔
واضح رہے کہ جنوبی افریقا اس سے قبل بھی کئی بڑے آئی سی سی ایونٹس کی میزبانی کر چکا ہے۔ ملک نے 2007 میں ٹی ٹوئنٹی ورلڈ کپ، 2009 میں چیمپئنز ٹرافی اور 2023 میں ویمنز ٹی ٹوئنٹی ورلڈ کپ کی کامیاب میزبانی کی تھی۔ دوسری جانب زمبابوے اور نمیبیا نے حالیہ برسوں میں انڈر 19 ورلڈ کپ سمیت مختلف بین الاقوامی ٹورنامنٹس کی میزبانی کر کے اپنی صلاحیتوں کا مظاہرہ کیا ہے۔
کرکٹ شائقین اب اس عالمی ایونٹ کے منتظر ہیں جہاں دنیا کی بہترین ٹیمیں ایک بار پھر عالمی چیمپئن بننے کے لیے میدان میں اتریں گی۔
آئی سی سی ون ڈے ورلڈ کپ 2027 کی تاریخوں کا اعلان
