ارجنٹائن کے فٹبالر لیونل میسی نے فیفا ورلڈ کپ 2026 کے گروپ مرحلے کے آخری میچ میں اردن کے خلاف شاندار کارکردگی کا مظاہرہ کرتے ہوئے ایک اور تاریخی اعزاز اپنے نام کر لیا۔
ارجنٹائن کےکپتان لیونل میسی نے ورلڈ کپ کی تاریخ میں نیا ریکارڈ قائم کرتے ہوئے مسلسل 7 میچوں میں گول کرنے والے پہلے کھلاڑی کا اعزاز حاصل کر لیا، جبکہ اردن کے خلاف گول کے ساتھ ورلڈ کپ میں ان کے مجموعی گولز کی تعداد 19 ہو گئی ہے،میسی نے میچ کے دوسرے ہاف میں متبادل کھلاڑی کے طور پر میدان میں اترنے کے بعد 80 ویں منٹ میں فری کک کے ذریعے گول کیا، ان کا کم اونچائی پر لگایا گیا خوبصورت شاٹ اردن کے دفاعی کھلاڑیوں کو چکمہ دیتے ہوئے جال میں جا پہنچا۔
اس گول کے ساتھ میسی نے ورلڈ کپ میں مسلسل 7 میچوں میں گول کرنے کا نیا ریکارڈ قائم کیااس سے قبل وہ فرانس کے جسٹ فونٹین اور برازیل کے جائیرزینہو کے ساتھ مسلسل 6 میچوں میں گول کرنے والے کھلاڑیوں میں شامل تھےاردن کے خلاف گول میسی کا ورلڈ کپ مقابلوں میں 19واں گول تھا، جس سے انہوں نے مردوں کے ورلڈ کپ میں سب سے زیادہ گول کرنے کا اپنا ریکارڈ مزید بہتر کر لیا،میسی کا یہ گول فری کک پر ان کے کیریئر کا 72واں گول تھا، جبکہ ارجنٹائن کے لیے فری کک پر یہ ان کا 12واں گول ہے، وہ اب بین الاقوامی فٹبال میں 202 میچوں میں 123 گول کر چکے ہیں-
ارجنٹائن نے اردن کو 3-1 سے شکست دے کر گروپ مرحلے کا اختتام کیا میسی نے میچ کا آغاز نہیں کیا کیونکہ ارجنٹائن پہلے ہی گروپ میں پہلی پوزیشن یقینی بنا چکا تھا، تاہم شائقین ان کی شرکت کے لیے بے تاب رہےمیسی 60ویں منٹ میں میدان میں آئے تو 70 ہزار سے زائد شائقین نے ان کا شاندار استقبال کیا، ارجنٹائن کے لیے د یگر گولز میں لو سیلسو اور لاؤتارو مارٹینز نمایاں رہے۔